അഴിമതി നടത്തുന്നത് മുഖ്യമന്ത്രിയായാല്‍ പോലും ശിക്ഷ അനുഭവിക്കണം; മോദി

ന്യൂഡല്‍ഹി: അഴിമതി നടത്തുന്ന ആരെയും വെറുതെ വിടില്ലെന്നും മുഖ്യമന്ത്രിയായാല്‍ പോലും ജയില്‍ ശിക്ഷ ലഭിക്കുമെന്നും പ്രധാനമന്ത്രി നരേന്ദ്രമോദി. കാലിത്തീറ്റ കുംഭകോണക്കേസില്‍ ജയില്‍ ശിക്ഷ ലഭിച്ച മുന്‍ ബിഹാര്‍ മുഖ്യമന്ത്രി ലാലു പ്രസാദ് യാദവിന്റെ പേരെടുത്ത് പറയാതെ ഡല്‍ഹിയില്‍ സംസാരിക്കുകയായിരുന്നു മോദി.

അഴിമതിക്കെതിരേയും കള്ളപ്പണത്തിനെതിരേയുമുള്ള പോരാട്ടം ശക്തമായി നടന്നുകൊണ്ടിരിക്കുകയാണെന്നും അഴിമതിക്കെതിരേ പോരാടുക എന്നതാണ് ബിജെപി സര്‍ക്കാരിന്റെ കര്‍മപരിപാടിയെന്നും മോദി പറഞ്ഞു. ന്യൂഡല്‍ഹിയില്‍ നടന്ന എന്‍ സി സി സംഘങ്ങളുടെ റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

ലാലുപ്രാസാദ് യാദവിനെ കാലിത്തീറ്റ കുംഭകോണവുമായി ബന്ധപ്പെട്ട കേസില്‍ കഴിഞ്ഞമാസമാണ് സി ബി ഐ കോടതി അഞ്ചുവര്‍ഷം തടവിന് ശിക്ഷിച്ചത്.