ആംആദ്മി പാര്‍ട്ടിയ്ക്ക് 30 കോടി രൂപ പിഴ

ന്യൂഡൽഹി: ചട്ടം ലംഘിച്ച സംഭാവന വാങ്ങിയെന്ന കേസിൽ 30 കോടി രൂപ നികുതിയടയ്ക്കാൻ ആംആദ്മി പാര്‍ട്ടിയോട് ആദായനികുതി വകുപ്പ് ഉത്തരവിട്ടു. ഡിസംബര്‍ ഏഴിനു മുൻപ് പണം അടയ്ക്കണം.

2014-15 കാലഘട്ടത്തിൽ എഎപിയ്ക്ക് ലഭിച്ച സംഭാവനകള്‍ നിയമം ലംഘിച്ചാണെന്ന് ആദായനികുതി വകുപ്പ് നടത്തിയ അന്വേഷണത്തിൽ കണ്ടെത്തിയിരുന്നു. രാഷ്ട്രീയപാര്‍ട്ടിയ്ക്കുള്ള സംഭാവനയല്ലാത്തതിനാൽ നികുതിയടയ്ക്കണമെന്നാണ് ആദായനികുതി ഉത്തരവ്. അതേസമയം ചരിത്രത്തിലാദ്യമായാണ് ഒരു രാഷ്ട്രീയപാര്‍ട്ടിയ്ക്ക് ലഭിച്ച സംഭാവനയ്ക്ക് നികുതിയടയ്ക്കേണ്ടി വരുന്നതെന്നും ഉത്തരവ് കേന്ദ്രസര്‍ക്കാരിന്‍റെ രാഷ്ട്രീയ പകപോക്കലാണെന്ന് ആംആദ്മി പാര്‍ട്ടി ആരോപിച്ചു.

വിഷയത്തിൽ വിശദീകരണം ആരാഞ്ഞ് നവംബര്‍ 17ന് അയച്ച കത്തിന് പാര്‍ട്ടി വ്യക്തമായ വിശദീകരണം നല്‍കാൻ തയ്യാറാകാത്തതിനെത്തുടര്‍ന്ന് 24ന് പിഴയൊടുക്കാൻ നോട്ടീസ് നല്‍കുകയായിരുന്നുവെന്ന് ആദായനികുതി വകുപ്പ് പ്രസ്താവനയിൽ അറിയിച്ചു. ആദായനികുതി നോട്ടീസിനെ നിയമപരമായി നേരിടുമെന്ന് എഎപി അറിയിച്ചു.