നരേന്ദ്ര മോദി ഷി ചിന്‍പിങ്ങുമായി കൂടിക്കാഴ്ച നടത്തി

പ്രധാനമന്ത്രി നരേന്ദ്ര മോദി ചൈനീസ് പ്രസിഡന്റ് ഷി ചിന്‍പിങ്ങുമായി കൂടിക്കാഴ്ച നടത്തി. ഭീകരവാദത്തെ നേരിടുന്നതു സംബന്ധിച്ച്‌ ഇന്ത്യയ്ക്കും ചൈനയ്ക്കുമിടയില്‍ ഭിന്നതയുണ്ടാകാന്‍ പാടില്ലെന്ന് ചിന്‍പിങ്ങിനോട് മോദി പറഞ്ഞു. ജെയ്ഷെ മുഹമ്മദ് ഭീകരന്‍ മസൂദ് അസ്ഹറിനെ യുഎന്‍ ആഗോള ഭീകര പട്ടികയില്‍പെടുത്തണമെന്ന ഇന്ത്യയുടെ ആവശ്യത്തെ എതിര്‍ക്കുന്ന ചൈനീസ് നിലപാട് സൂചിപ്പിച്ചായിരുന്നു മോദിയുടെ പ്രസ്താവനയെന്നത് ശ്രദ്ധേയമാണ്.

ഭീകരതയെ നേരിടാന്‍ ഇന്ത്യയും ചൈനയും തമ്മിലുള്ള ഉഭയകക്ഷി ബന്ധം ശക്തമാക്കണമെന്ന് ഷി ചിന്‍പിങ് പറഞ്ഞുവെന്നു വികാസ് സ്വരൂപ് അറിയിച്ചു.
എട്ടാമതു 'ബ്രിക്സ്' ഉച്ചകോടിയില്‍ പങ്കെടുക്കാനാണ് ചൈനീസ് പ്രസിഡന്റ് ഇന്ത്യയിലെത്തിയത്.
ഇന്ത്യയുടെ എന്‍എസ്ജി പ്രവേശനവും കൂടിക്കാഴ്ചയില്‍ വിഷയമായി. പ്രവേശനത്തിനു ചൈനയുടെ സഹകരണമുണ്ടാകുമെന്നാണ് പ്രതീക്ഷയെന്ന് മോദി പറഞ്ഞു. വിഷയത്തില്‍ ഒന്നാം ഘട്ട ചര്‍ച്ചകള്‍ കഴിഞ്ഞെന്നും രണ്ടാം ഘട്ടം ഉടന്‍ ആരംഭിക്കുമെന്നും ഷി ചിന്‍പിങ് പറഞ്ഞതായും വികാസ് സ്വരൂപ് അറിയിച്ചു.