ഇന്ത്യന്‍ സൈന്യം വെടിയുതിര്‍ക്കുന്നു എന്ന് പാക്കിസ്ഥാന്‍

ഇന്ത്യ-പാക്ക് ബന്ധം വഷളായ സാഹചര്യത്തില്‍ നിയന്ത്രണരേഖയ്ക്ക് സമീപം വെടിനിര്‍ത്തല്‍ കരാര്‍ ലംഘിക്കുന്ന പാക്കിസ്ഥാന് മറുപടിയുമായി ഇന്ത്യ. ഇന്ത്യന്‍ സൈനികര്‍ പാക്ക് സൈനികര്‍ക്കുനേരെ വെടിയുതിര്‍ക്കുന്നുവെന്ന് പാക്കിസ്ഥാന്‍ സൈനിക വക്താവ് ലഫ്.ജനറല്‍ അസിം ബജ്‍വ പറഞ്ഞു.

സെപ്റ്റംബര്‍ 29ന് ഇന്ത്യ നടത്തിയ മിന്നലാക്രമണത്തിനുശേഷം എല്ലാ ദിവസവും രാത്രിയില്‍ ഇന്ത്യന്‍ സൈന്യം പാക്ക് സൈനികര്‍ക്കു നേരെ വെടിയുതിര്‍ക്കുകയാണെന്ന് അദ്ദേഹം ആരോപിച്ചു.

ബുധനാഴ്ച ഇന്ത്യയുടെ ഭാഗത്തുനിന്നുള്ള വെടിവയ്പ്പ് രൂക്ഷമായിരുന്നുവെന്നും ബജ്‍വ പറഞ്ഞു. വിവിധ തരത്തിലുള്ള ആയുധങ്ങളും തോക്കുകളും ഷെല്ലുകളും ഉപയോഗിച്ച്‌ ഏതാണ്ട് 25,000 റൗണ്ടാണ് ഇന്ത്യന്‍ സൈന്യം വെടിയുതിര്‍ത്തതെന്ന് അദ്ദേഹം ആരോപിച്ചു.