'പോക്സോ' നിയമ ഭേദഗതിയ്ക്ക് കേന്ദ്രം; കുട്ടികളെ പീഡിപ്പിക്കുന്നവർക്കു വധശിക്ഷ

ഡൽഹി : 'പോക്സോ' നിയമം ഭേദഗതി ചെയ്യുന്ന വിഷയം ഗൗരവകരമായി പരിഗണയ്ക്കെടുക്കാനൊരുങ്ങി കേന്ദ്ര സര്‍ക്കാര്‍. പന്ത്രണ്ടു വയസ്സിൽ താഴെയുള്ള കുട്ടികളെ ലൈംഗികമായി ഉപദ്രവിക്കുന്നവർക്കു വധശിക്ഷ വ്യവസ്ഥ ചെയ്യുന്ന വിധത്തിലാണ് നിലവിലെ പോക്സോ നിയമം ഭേദഗതി വരുത്തുക. ഇക്കാര്യം കേന്ദ്ര സർക്കാർ സുപ്രീംകോടതിയെ അറിയിച്ചു. ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ച് എട്ടുമാസം പ്രായമുള്ള കുഞ്ഞിനെ ഉപദ്രവിച്ചതു സംബന്ധിച്ച പൊതു താൽപര്യഹർജി പരിഗണിക്കവെയാണു അഡീഷനൽ സോളിസിറ്റർ ജനറൽ പി.എസ്.നരസിംഹ ഇക്കാര്യം വ്യക്തമാക്കിയത്.

കുട്ടികളെ ലൈംഗികമായി ഉപദ്രവിക്കുന്നവർക്കു മരണശിക്ഷ നൽകണമെന്നാണ് അലഖ് അലോക് ശ്രീവാസ്തവ ഫയൽ ചെയ്ത പൊതു താൽപര്യഹർജിയിലെ പ്രധാന ആവശ്യം. എന്നാൽ ആദ്യ ഘട്ടത്തിൽ വധശിക്ഷ എല്ലാറ്റിനും പരിഹാരമല്ലെന്ന് അഡീഷനൽ സോളിസിറ്റർ ജനറൽ വാദിച്ചു. തുടർന്നാണു പുതിയ നിയമം സർക്കാരിന്‍റെ പരിഗണനയിലാണെന്ന വിവരം സുപ്രീംകോടതിയെ അറിയിച്ചത്.

എട്ടുമാസം പ്രായമായ ഉപദ്രവിക്കപ്പെട്ട കുട്ടിക്കു വിദഗ്ധ ചികിൽസയും 10ലക്ഷം രൂപ നഷ്ടപരിഹാരവും ലഭ്യമാക്കുക എന്നീ ആവശ്യങ്ങളും ഹർജിയിലുണ്ടായിരുന്നു. ഈ മാസം 27ന് ഹര്‍ജി വീണ്ടും പരിഗണിക്കും.