ഡാറ്റ ചോര്‍ച്ച: ഫേസ്‍ബുക്ക് വിശദീകരണം നല്‍കണം

ന്യൂഡല്‍ഹി: സ്വകാര്യ വിവരങ്ങള്‍ ചോര്‍ന്നതായുള്ള സംശയത്തില്‍ ഫേസ്‍ബുക്കിനോട് ഇന്ത്യന്‍ സര്‍ക്കാര്‍ വിശദീകരണം ആവശ്യപ്പെട്ടു. ഏപ്രില്‍ 7ന് മുന്‍പ് സ്വകാര്യത ലംഘനത്തില്‍ ഫേസ്‍ബുക്ക് മറുപടി പറയണം. ഇന്ത്യയിലെ തെരഞ്ഞെടുപ്പുകളെ സ്വാധീനിക്കാന്‍ ഫേസ്‍ബുക്ക് ഉപയോഗിച്ചതായുള്ള ആരോപണങ്ങളിലാണ് മറുപടി ആവശ്യപ്പെട്ടത്.

ലണ്ടന്‍ ആസ്ഥാനമായ കേംബ്രിജ് അനലിറ്റിക്ക എന്ന സ്ഥാപനം ഫേസ്‍ബുക്കില്‍ നിന്ന് സ്വകാര്യത വിവരങ്ങള്‍ ചോര്‍ത്തിയെന്നത് അമേരിക്കയില്‍ വലിയ കോളിളക്കം സൃഷ്‍ടിച്ചിരുന്നു. ഇതേ കമ്പനി ഇന്ത്യയിലെ ചില രാഷ്ട്രീയ പാര്‍ട്ടികളെയും സഹായിച്ചിട്ടുണ്ടെന്ന സംശയമാണ് കേന്ദ്രസര്‍ക്കാര്‍ ഉന്നയിക്കുന്നത്.

കേംബ്രിജ് അനലിറ്റിക്കയോ മറ്റെതെങ്കിലും സ്ഥാപനമോ ഇന്ത്യന്‍ വോട്ടര്‍മാരുടെ സ്വകാര്യത വിവരങ്ങള്‍ ചോര്‍ത്തിയിട്ടുണ്ടെങ്കില്‍ അതിന് മറുപടി നല്‍കണമെന്നും ഇന്ത്യ ആവശ്യപ്പെട്ടിട്ടുണ്ട്.