പ്രതിദിന കേസുകളില്‍ ആശ്വാസം; 24 മണിക്കൂറിനുള്ളില്‍ 61,871 രോഗബാധ, 1033 മരണം

ന്യൂഡല്‍ഹി: രാജ്യത്ത് പ്രതിദിന കൊവിഡ് കേസുകളില്‍ ആശ്വാസം. കഴിഞ്ഞ 24 മണിക്കൂറിനുള്ളില്‍ 61,871 പുതിയ കേസുകളാണ് റിപ്പോര്‍ട്ട് ചെയ്തത്. ഇന്നലെ റിപ്പോര്‍ട്ട് ചെയ്തതിനേക്കാളും 11,776 കേസുകളാണ് കുറവ് റിപ്പോര്‍ട്ട് ചെയ്തത്. ഇതോടെ രാജ്യത്തെ ആകെ രോഗബാധ 74,94,552 ആയി ഉയര്‍ന്നു.

Also Read: ജോസഫ് മാർത്തോമ്മാ മെത്രാപൊലീത്ത കാലം ചെയ്തു


ഈ സമയപരിധിയില്‍ 1033 പേര്‍ക്ക് ജീവന്‍ നഷ്ടപ്പെട്ടു. ഇതോടെ മരണസംഖ്യ 1,14,031 ആയി ഉയര്‍ന്നു. നിലവില്‍ 7,83,311 കേസുകളാണ് രാജ്യത്ത് വിവിധ ആശുപത്രികളിലായി ചികിത്സയിലുള്ളത്. 65,97,210 പേര്‍ ഇതുവരെ രോഗമുക്തി നേടിയതായി കേന്ദ്ര ആരോഗ്യ മന്ത്രാലയം പുറത്തുവിട്ട കണക്കുകള്‍ വ്യക്തമാക്കുന്നു.

മഹാരാഷ്ട്രയിൽ ഇന്നലെ 10,259 കേസുകളാണ് റിപ്പോര്‍ട്ട് ചെയ്തത്. അതിന് പുറമെ 250 മരണവും ആരോഗ്യവകുപ്പ് സ്ഥിരീകരിച്ചിട്ടുണ്ട്. മരണസംഖ്യയിലും കൊവിഡ് ബാധയിലും കുറവുണ്ടെന്നത് സംസ്ഥാനത്തിന് ആശ്വാസമേകുകയാണ്. 14,238 പേർ ഇന്ന് ആശുപത്രി വിടുകയും ചെയ്തിട്ടുണ്ട്. പുതിയ കണക്കുകള്‍ കൂടി വന്നതോടെ സംസ്ഥാനത്തെ കൊവിഡ് കേസുകളുടെ എണ്ണം 15,86,321 ആയി ഉയര്‍ന്നു. ഇതുവരെ സംസ്ഥാനത്ത് 41,965 മരണവും റിപ്പോര്‍ട്ട് ചെയ്തിട്ടുണ്ട്.

ശനിയാഴ്ച ആന്ധ്രാ പ്രദേശിൽ 3,676 പേർക്കാണ് കൊവിഡ്-19 സ്ഥിരീകരിച്ചത്. ഇതോടെ സംസ്ഥാനത്ത് കൊവിഡ് സ്ഥിരീകരിച്ചവരുടെ എണ്ണം 7,79,146 ആയി. 37,102 ആക്ടീവ് കേസുകളാണ് സംസ്ഥാനത്ത് നിലവിലുള്ളത്. ഇതുവരെ ആന്ധ്രാപ്രദേശിൽ 7,35,638 പേരാണ് രോഗമുക്തി നേടിയത്. 6,406 പേർക്ക് മാഹാമാരിയെത്തുടർന്ന് ജീവൻ നഷ്ടമായെന്നും സംസ്ഥാന ആരോഗ്യ വകുപ്പ് പുറത്തുവിട്ട കണക്കുകൾ വ്യക്തമാക്കുന്നു.

Also Read: അയോധ്യയ്ക്ക് പിന്നാലെ 'കൃഷ്ണജന്മഭൂമി'; പള്ളി പൊളിക്കാനുള്ള ഹർജിയിൽ ബിജെപിയ്ക്ക് പങ്കില്ലെന്ന് അമിത് ഷാ

കർണാടകയിൽ 7,184 പേർക്കാണ് ശനിയാഴ്ച കൊവിഡ്-19 സ്ഥിരീകരിച്ചത്. ഇന്ന് 71 മരണങ്ങൾ ആരോഗ്യ വകുപ്പ് സ്ഥിരീകരിച്ചെന്നതും ആശങ്ക ഉയർത്തുകയാണ്. സംസ്ഥാനത്ത് കൊവിഡ് ബാധിച്ചവരുടെ എണ്ണം 7,58,574 ആണ്. നിലവിൽ 1,10,647 ആക്ടീവ് കേസുകളാണ് ഉള്ളത്. ചികിത്സയിലുണ്ടായിരുന്ന 8,893 പേരുടെ പരിശോധനാ ഫലം ഇന്നലെ നെഗറ്റീവായതോടെ ആകെ രോഗമുക്തി നേടിയവരുടെ എണ്ണം 6,37,481 ആയി ഉയർന്നു.

തമിഴ്നാട്ടിൽ ഇന്നലെ 4,295 പേർക്ക് കൊവിഡ്-19 സ്ഥിരീകരിച്ചു. 5,005 പേരാണ് ശനിയാഴ്ച രോഗമുക്തി നേടിയത്. കഴിഞ്ഞ 24 മണിക്കൂറിനുള്ളിൽ 57 മരണങ്ങളാണ് സംസ്ഥാനത്ത് റിപ്പോർട്ട് ചെയ്തത്. സംസ്ഥാനത്ത് ഇതുവരെ രോഗം ബാധിച്ചവരുടെ എണ്ണം 6,83,486 ആയിരിക്കുകയാണ്. നിലവിൽ തമിഴ്നാട്ടിൽ 40,192 ആക്ടീവ് കേസുകളാണ് ഉള്ളത്. ആകെ 6,32,708 പേർക്കാണ് തമിഴ്നാട്ടിൽ കൊവിഡ് മുക്തി ലഭിച്ചത്.