സംസ്ഥാനങ്ങള്‍ അഭ്യര്‍ഥിച്ചു; ലോക്ക് ഡൗണ്‍ കേന്ദ്രം നീട്ടിയേക്കും

ന്യൂഡൽഹി: രാജ്യത്ത്കൊവിഡ്-19 വ്യാപനം തടയുന്നതിനായി ഏർപ്പെടുത്തിയ ലോക്ക് ഡൗണ്‍ നീട്ടിയേക്കുമെന്ന് റിപ്പോർട്ട്. വിവിധ സംസ്ഥാനങ്ങൾ ലോക്ക് ഡൗണ്‍ കാലവധി നീട്ടണമെന്ന് കേന്ദ്ര സർക്കാരിനോട് ആവശ്യപ്പെട്ട സാഹചര്യത്തിലാണ് ഈ നീക്കം. കേന്ദ്ര സർക്കാർ വൃത്തങ്ങളാണ് ഇക്കാര്യം ടൈംസ് ഓഫ് ഇന്ത്യയോട് വെളിപ്പെടുത്തിയത്.

ഇന്നലെ തെലങ്കാന ഉൾപ്പെടെയുള്ള സംസ്ഥാനങ്ങൾ ലോക്ക് ഡൗണ്‍ നീട്ടണമെന്ന് കേന്ദ്ര സർക്കാരിനോട് ആവശ്യപ്പെട്ടിരുന്നു. രണ്ടാഴ്ച കൂടി രാജ്യത്ത് ലോക്ക് ഡൗൺ നീട്ടണമെന്നായിരുന്നു തെലങ്കാന മുഖ്യമന്ത്രി ചന്ദ്രശേഖർ റാവു ഇന്നലെ പ്രധാനമന്ത്രിയോട് ആവശ്യപ്പെട്ടത്. ലോക്ക് ഡൗൺ പിൻവലിച്ചാലും അന്തർ സംസ്ഥാന യാത്രകൾക്ക് നിയന്ത്രണം ഏർപ്പെടുത്തണമെന്ന് ഛത്തിസ്ഗഢ് കേന്ദ്രസർക്കാരിനോട് ആവശ്യപ്പെട്ടതായും നേരത്തെ റിപ്പോർട്ടുകൾ പുറത്തുവന്നിരുന്നു.

Also Read: COVID-19 LIVE: കൊറോണവൈറസ് വ്യാപിക്കുന്നു, ജപ്പാന്‍ അടിയന്തരാവസ്ഥ പ്രഖ്യാപിച്ചു
ഉത്തർപ്രദേശ്, മഹാരാഷ്ട്ര, അസം തുടങ്ങിയ സംസ്ഥാനങ്ങളും ലോക്ക് ഡൗൺ നീട്ടണമെന്ന അഭിപ്രായമുള്ളവരാണ്. ഇളവുകളോടെയുള്ള ലോക്ക് ഡൗൺ വേണമെന്നാണ് മറ്റ് സംസ്ഥാനങ്ങലുടെ അഭിപ്രായം. മറ്റ് സംസ്ഥാനക്കാർക്ക് പ്രവേശന പെർമിറ്റ് ഏർപ്പെടുത്തണമെന്ന് അസം സർക്കാരും കേന്ദ്രത്തോട് ആവശ്യപ്പെട്ടിട്ടുണ്ട്.

വിവിധ സംസ്ഥാനങ്ങളുടെ അഭ്യർഥന പ്രകാരം കേന്ദ്രസർക്കാർ ഇതിനെക്കുറിച്ച് തീരുമാനമെടുക്കാനിരിക്കുകയാണെന്നാണ് സർക്കാരുമായി ബന്ധപ്പെട്ട വൃത്തങ്ങൾ വ്യക്തമാക്കുന്നത്.