ഇന്ദിരാ ഗാന്ധി മികച്ച ഭരണാധികാരി: പ്രണബ് മുഖര്‍ജി

കൊൽക്കത്ത: രാജ്യത്തെ ഏറ്റവും മികച്ച ഭരണാദികാരികളിൽ ഒരാളായിരുന്നു ഇന്ദിരാ ഗാന്ധിയെന്ന് മുൻ രാഷ്ട്രപതി പ്രണബ് മുഖര്‍ജി. യാഥാര്‍ത്ഥ്യങ്ങളിൽ നിന്ന് ഇന്ദിര ഒരിക്കലും ഒളിച്ചോടിയിട്ടില്ലെന്നും അദ്ദേഹം പറഞ്ഞു. ഇന്ദിരാ ഗാന്ധിയുടെ ജന്മശദാബ്ദിയുമായി ബന്ധപ്പെട്ട് കൊൽക്കത്തയിൽ സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം.

1978ൽ അടിയന്തരാവസ്ഥയ്ക്കുശേഷം ജവഹര്‍ലാൽ നെഹ്രുവിന്‍റെ ജന്മദിനത്തോടനുബന്ധിച്ചുള്ള പരിപാടിയിൽ സംബന്ധിക്കാൻ ലണ്ടനിലെത്തിയപ്പോള്‍ മാധ്യമപ്രവര്‍ത്തകരുമായി ഇന്ദിര സംവദിച്ച സംഭവം പ്രണബ് ഓര്‍മിപ്പിച്ചു. അടിയന്തരാവസ്ഥ നടപ്പാക്കിയതുമൂലം ഇന്ദിരയ്ക്കെതിരെ വലിയ എതിര്‍പ്പുണ്ടായിരുന്നതുമൂലം ലണ്ടൻ വിമാനത്താവളത്തിൽ മാധ്യമപ്രവര്‍ത്തകരോടു സംവദിക്കേണ്ടതില്ലെന്നായിരുന്നു നിര്‍ദേശം. എന്നാൽ അടിയന്തരാവസ്ഥ നടപ്പാക്കിയതുമൂലം എന്തുനേടിയെന്ന ചോദ്യത്തിന് രാജ്യത്തെ എല്ലാ ജനങ്ങളോടും ഒരേ ഉത്തരവാദിത്തമാണുള്ളതെന്നായിരുന്നു മറുപടി. ഇന്ദിര യാഥാര്‍ത്ഥ്യങ്ങളോടു മുഖം തിരിച്ചില്ലെന്നായിരുന്നു മാധ്യമപ്രവര്‍ത്തകരുടെ പ്രതികരണം.

ഇന്ദിര മതാന്ധതയെ ഒരിക്കലും പ്രോത്സാഹിപ്പിച്ചിരുന്നില്ല. രാജ്യത്തെ ശാസ്ത്രസാങ്കേതികരംഗത്തെ വളര്‍ച്ചയ്ക്ക് അടിത്തറയിട്ടതും ഇന്ദിരാ ഗാന്ധിയായിരുന്നുവെന്നും പ്രണബ് മുഖര്‍ജി പറഞ്ഞു.