ദോക്ലാം മേഖലയിലെ ഗ്രാമങ്ങള്‍ സൈന്യം ഒഴിപ്പിക്കുന്നു

ന്യൂഡല്‍ഹി: ദോക്ലാം അതിര്‍ത്തിയെ ചൊല്ലി ഇന്ത്യയും ചൈനയും തമ്മിലുള്ള തര്‍ക്കം തുടരുന്നതിനിടെ സൈന്യം മേഖലയിലെ ഗ്രാമങ്ങള്‍ ഒഴിപ്പിക്കുന്നു. ദോക്ലാമിന് സമീപമുള്ള നതാങ് ഗ്രാമത്തിലെ ജനങ്ങളോട് എത്രയും പെട്ടെന്ന് ഒഴിഞ്ഞുപോകാന്‍ സൈന്യം ആവശ്യപ്പെട്ടതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്‍തു.

ഇന്ത്യന്‍-ചൈനീസ് സൈന്യങ്ങള്‍ തമ്മില്‍ തര്‍ക്കമുണ്ടായ പ്രദേശത്തുനിന്ന് ഏതാണ്ട് 35 കിലോമീറ്റര്‍ ദൂരത്താണ് നതാങ്. ഇന്ത്യന്‍ സൈന്യത്തിന്‍റെ 33 കോര്‍പ് സുക്നയില്‍നിന്ന് ദോക്ലാം മേഖലയിലേക്ക് നീങ്ങുന്നുണ്ട്. ആയിരക്കണക്കിന് വരുന്ന ഈ സൈനികരെ താമസിപ്പിക്കുന്നതിനാണോ അതോ ചൈനയുടെ ഭാഗത്തുനിന്ന് ഏതെങ്കിലും തരത്തിലുള്ള പ്രകോപനമുണ്ടായാല്‍ മുന്‍കരുതല്‍ എന്ന നിലയിലാണോ ഗ്രാമം ഒഴിപ്പിച്ചതെന്ന് വ്യക്തമല്ല.

സൈനികനീക്കത്തെക്കുറിച്ച് അധികൃതര്‍ വ്യക്തമാക്കിയിട്ടില്ല. എന്നാല്‍ സൈനികരുടെ സാന്നിധ്യം ഗ്രാമവാസികള്‍ സ്ഥിരീകരിച്ചിട്ടുണ്ട്. എന്നാല്‍, വാര്‍ഷിക അഭ്യാസത്തിന്‍റെ ഭാഗം മാത്രമാണ് സൈനികനീക്കം എന്നാണ് ചില ഉന്നത സൈനികോദ്യോഗസ്ഥര്‍ പറയുന്നത്.

ഇന്ത്യയുടെ ചൈനയും ഭൂട്ടാനും ചേരുന്ന ഭാഗത്ത് ചൈനീസ് സൈനികര്‍ കടന്നുകയറി പാലം നിര്‍മാണം ആരംഭിച്ചതോടെയാണ് പ്രശ്‍നങ്ങള്‍ ഉടലെടുത്തത്. ദോക്ലാം തങ്ങളുടേതാണെന്ന നിലപാടാണ് ചൈന കൈക്കൊള്ളുന്നത്. കഴിഞ്ഞ ഏതാനും ആഴ്‍ചകളായി തങ്ങള്‍ യുദ്ധത്തിന് തയ്യാറെടുക്കുന്നതായുള്ള വാര്‍ത്തകളാണ് ചൈനീസ് മാധ്യമങ്ങള്‍ പുറത്തുവിട്ടുകൊണ്ടിരിക്കുന്നത്.

Indian Army Orders People Near Doklam to Vacate Their Village

Nathang village is 35 km from the Doklam India-Bhutan-China tri-junction, the site of the two-month old standoff between Indian and Chinese troops.