ന്യൂഡൽഹി: രാജ്യത്ത് കൊവിഡ്-19 റിപ്പോർട്ട് ചെയ്യുന്നതിന് മുന്നേ രോഗവുമായി ബന്ധപ്പെട്ട് നിരവധി വ്യാജ വാർത്തകൾ പ്രചരിക്കാൻ തുടങ്ങിയിരുന്നു. നേരത്തെ കൊറോണയുടെ പശ്ചാത്തലത്തിൽ പ്രധാനമന്ത്രി ആദ്യ തവണ രാജ്യത്തെ അഭിസംബോധന ചെയ്യുന്നെന്ന വാർത്ത പുറത്തുവന്നപ്പോളും നിരവധി അഭ്യൂഹങ്ങളും വ്യാജവാർത്തകളും പ്രചരിച്ചു.
കൊറോണ വൈറസിനെതിരെ രാജ്യം ലോക്ക് ഡൗണിലൂടെ കടന്ന് പോകുന്നതിനിടെ ഏറ്റവും ഒടുവിൽ പ്രചരിച്ച വാർത്ത ഏപ്രിൽ പകുതിയോടെ രാജ്യത്ത് അടിയന്തരാവസ്ഥ പ്രഖ്യാപിക്കുന്നു എന്നതായിരുന്നു. എന്നാൽ ഈ വാർത്ത വാസ്തവവിരുദ്ധമാണെന്ന് വ്യക്തമാക്കിയിരിക്കുകയാണ് കരസേന. തങ്ങളുടെ ട്വിറ്റർ ഹാൻഡിലിലൂടെയാണ് വ്യാജവാർത്തയെക്കുറിച്ച് ഇന്ത്യൻ ആർമി പ്രതികരിച്ചത്.
രാജ്യം 21 ദിവസത്തെ ലോക്ക് ഡൗണിലൂടെ കടന്ന് പോകവെയായിരുന്നു, രോഗ വ്യാപനം നിയന്ത്രിക്കാൻ അടിയന്തരാവസ്ഥയും പ്രഖ്യാപിക്കുമെന്ന പ്രചരണം ആരംഭിച്ചത് നേരത്തെ ലോക്ക് ഡൗൺ നീട്ടുമെന്ന വാർത്തകൾ തള്ളി കേന്ദ്ര കാബിനറ്റ് സെക്രട്ടരി രാജീവ് ഗൗബയും രംഗത്തെത്തിയിരുന്നു.
ലോക്ക് ഡൗൺ നീട്ടുന്നതിനെക്കുറിച്ചുള്ള ഒരു ആലോചനയും കേന്ദ്ര സർക്കാർ നടത്തുന്നില്ലെന്നും. ഇത്തരം വാർത്തകൾ കാണുമ്പോൾ ആശ്ചര്യം തോന്നുകയാണെന്നുമായിരുന്നു കാബിനറ്റ് സെക്രട്ടറിയുടെ പ്രതികരണം. ചൈനയിലേതിന് സമാനമായി കൂടുതൽ ദിവസത്തേക്ക് ഇന്ത്യയും ലോക്ക് ഡൗൺ നീക്കിയേക്കുമെന്നായിരുന്നു ഇതുസംബന്ധിച്ച് വാത്തകൾ പ്രചരിച്ചിരുന്നത്.