അതിര്‍ത്തി കടന്ന ചൈനീസ് സൈനികനെ പിടികൂടി ഇന്ത്യൻ സൈന്യം; ചൈനയിലേയ്ക്ക് തിരിച്ചയയ്ക്കും

ന്യൂഡൽഹി: ലഡാഖിൽ യഥാര്‍ഥ നിയന്ത്രണരേഖയ്ക്കപ്പുറം ഇന്ത്യൻ പ്രദേശത്തു വെച്ചു കണ്ട കടന്ന ചൈനീസ് സൈനികൻ പിടിയിൽ. ലഡാഖിലെ ചുമാര്‍ - ദെംചോക് പ്രദേശത്തു വെച്ചാണ് ചൈനീസ് സൈനികനെ പിടികൂടിയതെന്നാണ് റിപ്പോര്‍ട്ടുകള്‍. ഇദ്ദേഹത്തിന് സൈന്യം ചട്ടപ്രകാരമുള്ള സഹായങ്ങള്‍ ചെയ്തതായും ചൈനീസ് സൈന്യത്തിന് കൈമാറുമെന്നും ഇന്ത്യൻ സൈന്യം വ്യക്തമാക്കി.

കോര്‍പ്പറൽ വാങ് യാ ലോങ് ആണ് ഇന്ത്യൻ സൈന്യത്തിൻ്റെ പിടിയിലായതെന്നാണ് കിഴക്കൻ ലഡാഖിൽ യഥാര്‍ഥ നിയന്ത്രണരേഖയ്ക്ക് സമീപത്തു നിന്ന് പിടിയിലായതെന്നാണ് സൈനിക വൃത്തങ്ങളെ ഉദ്ധരിച്ചുള്ള എൻഡിടിവി റിപ്പോര്‍ട്ട്. "നിലവിലുള്ള പ്രോട്ടോകോള്‍ പ്രകാരം നടപടികള്‍ക്കു ശേഷം പീപ്പിള്‍സ് ലിബറേഷൻ ആര്‍മി സൈനികനെ ചൈനീസ് സൈന്യത്തിന് കൈമാറും." സൈന്യം പ്രസ്താവനയിൽ അറിയിച്ചു. ഇദ്ദേഹത്തിന് ഓക്സിജൻ അടക്കമുള്ള വൈദ്യസഹായവും ഭക്ഷണവും തണുപ്പകറ്റാനുള്ള വസ്ത്രങ്ങളും നല്‍കിയതായും സൈന്യം പ്രസ്താവനയിൽ അറിയിച്ചു.

Also Read: വീട്ടിൽ തന്നെ പരിചരണം; 78കാരി കൊവിഡ് മുക്തയായത് 10 ദിവസം കൊണ്ട്

തങ്ങളുടെ ഒരു സൈനികനെ കാണാതായിട്ടുണ്ടെന്ന് അറിയിച്ചുകൊണ്ടുള്ള അപേക്ഷ ചൈനീസ് സൈന്യത്തിൽ നിന്ന് ലഭിച്ചിട്ടുണ്ടെന്നും ഇന്ത്യൻ സൈന്യം അറിയിച്ചു. ആവശ്യമായ നടപടികള്‍ പൂര്‍ത്തീകരിച്ചതിനു ശേഷം ഇദ്ദേഹത്തെ ചുഷൂൽ മോള്‍ഡോ മീറ്റിങ് പോയിൻ്റിൽ വെച്ച് കൈമാറുമെന്നും സൈന്യം അറിയിച്ചു.

അതേസമയം, പിടിയിലായ സമയത്ത് ഇയാളുടെ കൈവശം ഔദ്യോഗിക, സൈനിക രേഖകളുണ്ടായിരുന്നുെന്നും റിപ്പോര്‍ട്ടുകളുണ്ട്.

Also Read: എം ശിവശങ്കറിൻ്റെ അറസ്‌റ്റ് 23വരെ തടഞ്ഞ് ഹൈക്കോടതി; കസ്‌റ്റംസിന് തിരിച്ചടി

ഈ വര്‍ഷം മെയ് മാസം മുതൽ കിഴക്കൻ ലഡാഖിൽ ഇന്ത്യ ചൈന അതിര്‍ത്തി സംഘര്‍ഷം രൂക്ഷമായി തുടരുന്നതിനിടെയാണ് പുതിയ സംഭവം. ജൂൺ 15ന് ലഡാഖിലെ ഗാൽവൻ താഴ്‍വരയിൽ നടന്ന സൈനിക ഏറ്റുമുട്ടലിൽ 20 ഇന്ത്യൻ സൈനികര്‍ കൊല്ലപ്പെട്ടിരുന്നു. ഇതിനു ശേഷം ഇരുരാജ്യങ്ങളും തമ്മിലുള്ള പ്രശ്നങ്ങള്‍ പരിഹരിക്കാൻ ഏഴു റൗണ്ടോളം ചര്‍ച്ചകള്‍ നടത്തിയിട്ടുണ്ടെങ്കിലും തര്‍ക്കം പൂര്‍ണമായി പരിഹരിക്കപ്പെട്ടിട്ടില്ല.