നിരോധിച്ച നോട്ടുകളില്‍ 97 ശതമാനവും തിരിച്ചെത്തി

ന്യൂഡല്‍ഹി: കേന്ദ്ര സര്‍ക്കാര്‍ നിരോധിച്ച അഞ്ഞൂറിന്‍റെയും ആയിരത്തിന്‍റെയും നോട്ടുകളില്‍ 97 ശതമാനവും തിരിച്ചെത്തിയതായി റിപ്പോര്‍ട്ട്. നിരോധിച്ച 15.4 ലക്ഷം കോടി രൂപയില്‍ 14.97 ലക്ഷം കോടിയും ഡിസംബര്‍ 30 ഓടെ രാജ്യത്തെ ബാങ്കുകളില്‍ നിക്ഷേപിക്കപ്പെട്ടതായാണ് റിപ്പോര്‍ട്ട്.

നോട്ടുകളില്‍ ഭൂരിഭാഗവും തിരിച്ചെത്തിയതോടെ നരേന്ദ്ര മോദി സര്‍ക്കാരിന്‍റെ കള്ളപ്പണത്തിനെതിരായുള്ള പോരാട്ടത്തിനാണ് തിരിച്ചടിയേറ്റിരിക്കുന്നത്. അസാധുവാക്കപ്പെട്ടതില്‍ അഞ്ചു ലക്ഷം കോടി രൂപയെങ്കിലും കള്ളപ്പണമായിരിക്കുമെന്നും ഇത് ബാങ്കിങ് വ്യവസത്ഥയിലേക്ക് തിരിച്ചെത്തില്ലെന്നുമായിരുന്നു സര്‍ക്കാരിന്‍റെ കണക്കുകൂട്ടല്‍.

അതേസമയം നോട്ടു നിരോധനം നടപ്പാക്കിയതിന്‍റെ ആഘാതം ഇന്ത്യന്‍ സമ്പദ് വ്യവസ്ഥയ്ക്ക് ഭീഷണിയാകുമെന്നാണ് വിവിധ അന്താരാഷ്ട്ര ഏജന്‍സികളുടെ റിപ്പോര്‍ട്ടുകള്‍ സൂചിപ്പിക്കുന്നത്. രാജ്യത്ത് അനുഭവപ്പെടുന്ന സാമ്പത്തിക ഞെരുക്കം ലോകത്ത് ഏറ്റവും വേഗത്തില്‍ വളരുന്ന രാജ്യം എന്ന പദവി ഇന്ത്യയ്ക്ക് നഷ്ടപ്പെടുത്തുമെന്നും അഭിപ്രായമുണ്ട്.

Indians have deposited nearly all the currency bills outlawed at the end of the deadline last year.