ഇന്നത്തെ കണക്കുകൾ
രോഗബാധിതര്‍ എട്ട് ലക്ഷം കവിഞ്ഞു
പുതിയ കൊവിഡ് രോഗികളുടെ പട്ടിക കൂടി പുറത്തു വന്നതോടെ രാജ്യത്തെ ആകെയുള്ള രോഗികളുടെ എണ്ണവും വര്‍ദ്ധിച്ചു. നിലവില്‍ 8,49,553 പേര്‍ക്കാണ് രോഗബാധ സ്ഥിരീകരിച്ചിരിക്കുന്നത്. ഇതിൽ 2,92,258 പേരാണ് ചികിത്സയില്‍ കഴിയുന്നത്. 5,34,621 പേര്‍ക്ക് രോഗം ഭേദമായി ആശുപത്രി വിട്ടു. 22,674 പേര്‍ക്ക് ജീവൻ നഷ്ടപ്പെടുകയും ചെയ്തിട്ടുണ്ട്. കേന്ദ്ര ആരോഗ്യമന്ത്രാലയമാണ് ഈ പുതിയ കണക്കുകള്‍ പുറത്തുവിട്ടിരിക്കുന്നത്.
കൊവിഡ് രോഗമുക്തി നിരക്ക് 62.78 ശതമാനം
രാജ്യത്ത് കൊവിഡ് രോഗികളുടെ എണ്ണത്തിൽ പ്രതിദിനം വര്‍ദ്ധനവ് ഉണ്ടാകുമ്പോഴും രോഗം ഭേദമാകുന്നവരുടെ നിരക്കിൽ വര്‍ദ്ധനവുണ്ടാകുന്നത് ആശ്വാസമാകുന്നു. കേന്ദ്ര മന്ത്രാലയം പുറത്തു വിടുന്ന പുറത്തുവിടുന്ന കണക്ക് പ്രകാരം രാജ്യത്ത് രോഗമുക്തി നേടിയവരുടെ നിരക്ക് 62.78 ശതമാനമായി ഉയര്‍ന്നതായി ആരോഗ്യ മന്ത്രാലയം വ്യക്തമാക്കി. നിലവിൽ 5,34,621 പേര്‍ക്ക് രോഗം ഭേദമായി ആശുപത്രി വിട്ടതായാണ് കണക്കുകള്‍ സൂചിപ്പിക്കുന്നത്.
കൊവിഡ് കേസുകളില്‍ മുന്നില്‍ മഹാരാഷ്ട്ര
രാജ്യത്ത് ഏറ്റവും അധികം കൊവിഡ് രോഗികളുള്ളത് മഹാരാഷ്ട്രയിലാണ്. ഇന്നലെ ഒരു ദിവസത്തിനുള്ളില്‍ 8,139 പേര്‍ക്ക് കൂടി കൊവിഡ് രോഗബാധ റിപ്പോര്‍ട്ട് ചെയ്തു 24 മണിക്കൂറിനിടെ 223 മരണവും സംസ്ഥാനത്ത് റിപ്പോർട്ട് ചെയ്തു. ഇതുവരെ റിപ്പോര്‍ട്ട് ചെയ്തതിൽ ഏറ്റവും ഉയര്‍ന്ന കണക്കാണിത്. 10,160 പേരാണ് സംസ്ഥാനത്ത് ഇതുവരെ മരിച്ചത്. ഇതില്‍ 1,308 കേസുകളും റിപ്പോര്‍ട്ട് ചെയ്തിരിക്കുന്നത് മുംബൈ നഗരത്തില്‍ നിന്നുമാണ്. സംസ്ഥാനത്ത് 4,360 പേര്‍ക്ക് രോഗം ഭേദമായി ആശുപത്രി വിട്ടതായും കണക്കുകള്‍ സൂചിപ്പിക്കുന്നു. ഇതോടെ സംസ്ഥാനത്ത് കൊവിഡ് രോഗം ബാധിച്ചവരുടെ എണ്ണം രണ്ടരലക്ഷത്തിലേക്ക് അടുക്കുകയാണ്. മുംബൈ രാജ്ഭവനിൽ 18 പേര്‍ക്ക് പോസിറ്റീവായി.
ലോകത്താകമാനം 1.2 കോടി രോഗബാധിതര്‍
ലോകത്താകമാനം 12,846,931 പേര്‍ക്കാണ് രോഗബാധ റിപ്പോര്‍ട്ട് ചെയ്തിരിക്കുന്നത്. അഞ്ചര ലക്ഷത്തിലധികം ആളുകളാണ് രോഗം ബാധിച്ച് മരിച്ചിരിക്കുന്നത്. 74 ലക്ഷത്തിലധികം ആളുകള്‍ക്ക് രോഗമുക്തിയും റിപ്പോര്‍ട്ട് ചെയ്തിട്ടുണ്ട്. അമേരിക്കയിലാണ് ഏറ്റവുമധികം രോഗികളുള്ളത്. അവിടെ മാത്രം 3,355,646 രോഗബാധിതരാണുള്ളത്. രോഗം ബാധിച്ച് മരിച്ചവരുടെ എണ്ണവും ഇവിടെ ഉയര്‍ന്നു വരികയാണ്. 137,403 പേർക്കാണ് രോഗബാധയെ തുടര്‍ന്ന് ജീവൻ നഷ്ടപ്പെട്ടിരിക്കുന്നത്. രണ്ടാം സ്ഥാനത്ത് ബ്രസീലും ഇടം പിടിച്ചിട്ടുണ്ട്. 18 ലക്ഷം ആളുകള്‍ക്കാണ രോഗബാധ റിപ്പോര്‍ട്ട് ചെയ്തിരിക്കുന്നത്. ആഗോള കണക്കുകളില്‍ മൂന്നാം സ്ഥാനത്താണ് ഇന്ത്യയുള്ളത്.