81,484 പേർക്ക് കൂടി രോഗബാധ
കൊവിഡ് ബാധ രൂക്ഷമായി തുടരുന്നതിനിടെ കഴിഞ്ഞ 24 മണിക്കൂറിനുള്ളിൽ രാജ്യത്ത് 81,484 പേർക്ക് കൂടി കൊവിഡ് സ്ഥിരീകരിച്ചതായി ആരോഗ്യ മന്ത്രാലയം വ്യക്തമാക്കി. ഇന്ന് രാവിലെ പുറത്തുവിട്ട കണക്കുകളിലാണ് ഈ വിവരങ്ങളുള്ളത്. ഇതോടെ രാജ്യത്തെ ആകെ കൊവിഡ് ബാധിതരുടെ എണ്ണം 63,94,069 ആയി. രാജ്യത്ത് നിലവില്‍ 9,42,217 സജീവ കേസുകളാണുള്ളത്. 53,52,078 പേര്‍ രോഗമുക്തി നേടിയെന്നും മന്ത്രാലയം വ്യക്തമാക്കുന്നു.
രാജ്യത്ത് മരണസംഖ്യ ഉയരുന്നു
കൊവിഡ് കേസുകളുടെ വർധന തുടരുന്ന സാഹചര്യത്തിൽ രാജ്യത്ത് മരണസംഖ്യ ഉയർന്നു. കഴിഞ്ഞ 24 മണിക്കൂറിനിടെ 1,095 കൊവിഡ് മരണങ്ങൾ റിപ്പോർട്ട് ചെയ്‌തതോടെ രാജ്യത്തെ ആകെ മരണസംഖ്യ 99,773 ആയി ഉയർന്നു. മരണനിരക്ക് വർധിക്കുന്നത് പ്രതിരോധ പ്രവർത്തനങ്ങൾക്ക് തിരിച്ചടിയാണ്. ഒക്‌ടോബർ ഒന്നുവരെ രാജ്യത്ത് 7,67,17,728 സാമ്പിളുകൾ പരിശോധിച്ചതായി ഇന്ത്യൻ കൗൺസിൽ ഓഫ് മെഡിക്കൽ റിസർച്ച അറിയിച്ചു. ഇന്നലെ മാത്രം 10,97,947 സാമ്പിളുകൾ പരിശോധിച്ചതായും അധികൃതർ വ്യക്തമാക്കുന്നു.
മഹാരാഷ്‌ട്രയിൽ രോഗബാധിതരുടെ എണ്ണം 14 ലക്ഷം കവിഞ്ഞു
രാജ്യത്ത് ഏറ്റവുമധികം കൊവിഡ് കേസുകൾ റിപ്പോർട്ട് ചെയ്‌ത മഹാരാഷ്‌ട്രയിൽ ആകെ കൊവിഡ് ബാധിതരുടെ എണ്ണം 14 ലക്ഷം കവിഞ്ഞു. ഇതുവരെ സംസ്ഥാനത്ത് 14,00,922 പേർക്കാണ് കൊവിഡ് സ്ഥിരീകരിച്ചത്. ആന്ധ്രപ്രദേശിൽ 7,00,235 കേസുകളും കർണാടകയിൽ 6,11,837 കേസുകൾ റിപ്പോർട്ട് ചെയ്‌തു. തമിഴ്നാട്ടിൽ 6,03,290 പേർക്കാണ് രോഗം. ഉത്തർപ്രദേശിൽ 4,03,101 കേസുകളും ഡൽഹിയിൽ 2,82,752 കേസുകളുമാണ് റിപ്പോർട്ട് ചെയ്യപ്പെട്ടത്.
അൺലോക്ക് അഞ്ചാംഘട്ടത്തിൽ രാജ്യം
അൺലോക്ക് അഞ്ചാംഘട്ടം കേന്ദ്ര സർക്കാർ പ്രഖ്യാപിച്ച സാഹചര്യത്തിൽ കൊവിഡ് കേസുകൾ വർധിക്കുകയാണ്. മഹാരാഷ്‌ട്ര, തമിഴ്‌നാട്, ആന്ധ, കർണാടക സംസ്ഥാനങ്ങളിലാണ് രോഗബാധയിൽ കുതിപ്പ് തുടരുന്നത്. അൺലോക്ക് ഇളവുകൾ തുടരുന്ന സാഹചര്യത്തിൽ കൊവിഡ് ബാധിതരുടെ എണ്ണം വർധിക്കുമോ എന്ന ആശങ്കയാണുള്ളത്. ലോകത്ത് ഏറ്റവുമധികം കൊവിഡ് കേസുകൾ റിപ്പോർട്ട് ചെയ്‌തിരിക്കുന്നത് അമേരിക്കയിലാണ്. ഇന്ത്യയും ബ്രസീലുമാണ് പിന്നാലെയുള്ളത്.