ബെംഗളൂരുവില്‍ ഹെലികോപ്ടര്‍ ടാക്‌സി സര്‍വ്വീസ് ആരംഭിക്കുന്നു

ബെംഗളൂരു: ഇന്ത്യയിലെ ആദ്യ ഹെലികോപ്ടർ ടാക്സി സർവീസിന് ബെംഗളൂരുവിൽ തുടക്കമാകുന്നു. ബെംഗളൂരു അന്താരാഷ്ട്ര സർവീസുമായി ചേർന്ന് തുമ്പി ഏവിയേഷനാണ് ടാക്സി സർവീസ് നടപ്പിലാക്കുന്നത്. കെമ്പ ഗൗഡ അന്താരാഷ്ട്ര വിമാനത്താവളത്തില്‍ നിന്ന് ഇലക്ട്രോണിക് സിറ്റി വരെയാണ് സർവീസ് നടപ്പിലാക്കാൻ പദ്ധതിയിടുന്നത്. റോഡ് മാർഗം രണ്ട് മണിക്കൂർ എടുക്കുന്ന യാത്രയ്ക്ക് ഹെലികോപ്ടർ വഴിയെത്താൻ 15 മിനിറ്റ് മതിയാകും.

ഹെലി സർവീസ് നിരക്കുകൾ ഇതുവരെ നിശ്ചയിച്ചിട്ടില്ല. നിരക്കുകൾ സാധാരണക്കാർക്ക് താങ്ങുന്ന വിധത്തിലാകണമെന്ന് കേന്ദ്ര വ്യോമയാന സഹമന്ത്രി ജയന്ത് സിൻഹ വ്യക്തമാക്കിയിരുന്നു. നിരക്ക് 3000-4000 നും ഇടയിലായിരിക്കുമെന്നാണ് സൂചന. ആദ്യഘട്ടത്തില്‍ രണ്ട് ഹെലികോപ്ടറുകളാണ് സർവീസ് നടത്തുക. പതിമൂന്ന് യാത്രക്കാരും രണ്ട് പൈലറ്റുമാരും ഉൾക്കൊള്ളുന്ന ബെല്‍ 412 ഹെലികോപ്ടറും, അഞ്ച് യാത്രക്കാർക്കും രണ്ട് പൈലറ്റുമാർക്കും ഇരിക്കാവുന്ന ബെല്‍ 407 ഹെലികോപ്ടറും.

60,000 യാത്രക്കാരിൽ 100 പേരെങ്കിലും ഹെലിടാക്സി ഉപയോഗിച്ചാല്‍ പദ്ധതി വിജയകരമാക്കും. അങ്ങനെയെങ്കിൽ യാത്രാനിരക്ക് കുറയ്ക്കാൻ കഴിയുമെന്നാണ് അധികൃതരുടെ പ്രതീക്ഷ. നിലവില്‍ 90-ഓളം ഹെലിപാഡുകളാണ് ബെംഗളൂരു നഗരത്തിലുള്ളത് ഇവയുടെ എണ്ണം വർധിപ്പിക്കാനുള്ള തീരുമാനത്തിലാണ് സംസ്ഥാന സർക്കാർ.

India's First Helicopter Taxi Service in Bengaluru

Bengaluru may soon become India’s first city to get a helicopter taxi service.