എന്‍ജിനില്‍ നിന്ന് പുകയയുര്‍ന്നു; ഗോവ മന്ത്രി കയറിയ വിമാനം തിരിച്ചിറക്കി

പനജി: എന്‍ജിനില്‍ നിന്ന് പുക ഉയര്‍ന്നതിനെ തുടര്‍ന്ന് ഗോവ-ഡല്‍ഹി ഇൻഡിഗോ വിമാനം അടിയന്തിരമായി തിരിച്ചിറക്കി. ഗോവ പരിസ്ഥിതി മന്ത്രി നിലേഷ് കബ്രാല്‍ ഉള്‍പ്പെടെ 180 യാത്രാക്കാരാണ് വിമാനത്തിലുണ്ടായിരുന്നത്.

ഗോവയിലെ ദബോളിം വിമാനത്താവളത്തില്‍ നിന്ന് പറന്നുയര്‍ന്ന് മിനിറ്റുകള്‍ക്കമാണ് വിമാനത്തിന്‍റെ എൻജിനില്‍ നിന്ന് പുക ഉയര്‍ന്നത്. തുടര്‍ന്ന് വമാനം ഉടനെ തിരിച്ച് ഇറക്കുകയായിരുന്നു.

വിമാനത്തില്‍ നിന്ന് ജീവനക്കാരെയും യാത്രക്കാരെയും സുരക്ഷിതമായി മാറ്റിയെന്നും അപകടമുണ്ടാകാനുള്ള കാരണം പരിശോധിക്കുകയാണെന്നും അധികൃതര്‍ അറിയിച്ചു.

പറന്നുയര്‍ന്ന് 20 മിനിറ്റായപ്പോഴാണ് വിമാനത്തിന്‍റെ ഇടത് എന്‍ജിനില്‍ നിന്ന് പുക ഉയരുന്നത് കണ്ടതെന്ന് മന്ത്രി നിലേഷ് കബ്രാല്‍ പറഞ്ഞു. പുക കണ്ട യാത്രക്കാര്‍ പരിഭ്രാന്തരാവുകയും ഉറക്കെ നിലവിളിക്കുകയും ചെയ്‍തു. എന്നാല്‍ പൈലറ്റ് ഉടനെ പുക വന്ന എന്‍ജിന്‍ ഓഫാക്കുകയും വിമാനം അടിയന്തിരമായി ലാന്‍ഡ് ചെയ്യിക്കുകയുമായിരുന്നു. പൈലറ്റ് സംയമനത്തോടെ പ്രവര്‍ത്തിച്ചതിനാലാണ് വന്‍ അപകടം ഒഴിവായതെന്നും മന്ത്രി പറഞ്ഞു.

പിന്നീട് മന്ത്രിയും സംഘവും മറ്റൊരു വമാനത്തില്‍ ഡല്‍ഹിയിലേക്ക് പോയി.