ശിശുമരണ നിരക്ക് ഏറ്റവും കുറവ് കേരളത്തില്‍

ന്യൂഡല്‍ഹി: വാര്‍ഷിക ശിശുമരണ നിരക്ക് ഏറ്റവും കുറവ് കേരളത്തിലെന്ന് കേന്ദ്ര ആരോഗ്യ മന്ത്രാലയം. ആരോഗ്യ മന്ത്രാലയം പുറത്തിറക്കിയ പട്ടികയില്‍ ഒന്നാം സ്ഥാനം കേരളം കരസ്ഥമാക്കി. മിസോറാം, കര്‍ണാടക എന്നിവ രണ്ടും മൂന്നും സ്ഥാനങ്ങളിലെത്തി.

ഇന്ത്യയിലെ പൊതു ആരോഗ്യ സംരക്ഷണത്തെ സംബന്ധിച്ചുള്ള ദേശീയ സമ്മേളനത്തില്‍ കേന്ദ്ര ആരോഗ്യമന്ത്രി ജെ പി നദ്ദയാണ് റിപ്പോര്‍ട്ട് പ്രസിദ്ധീകരിച്ചത്.

ആരോഗ്യ സംരക്ഷണത്തില്‍ കേന്ദ്ര സര്‍ക്കാര്‍ നൂതനമായ ആശയങ്ങളിലേക്ക് കടക്കുകയാണെന്ന് സമ്മേളനം ഉദ്ഘാടനം ചെയ്തു സംസാരിക്കവേ ജെ പി നദ്ദ പറഞ്ഞു. സംസ്ഥാനങ്ങളുടെ ആരോഗ്യമേഖലയില്‍ കേന്ദ്ര സര്‍ക്കാരിന്‍റെ എല്ലാവിധ സഹായങ്ങളുണ്ടാകുമെന്ന് അദ്ദേഹം കൂട്ടിച്ചേര്‍ത്തു.

നവജാത ശിശുമരണ നിരക്ക് ഏറ്റവും കുറവുള്ള സംസ്ഥാനം ഹിമാചല്‍ പ്രദേശാണ്. തമിഴ്നാട്, ഡല്‍ഹി എന്നിവ രണ്ടും മൂന്നും സ്ഥാനങ്ങളിലെത്തി.

കുടുംബാസൂത്രണത്തില്‍ മികച്ച സംസ്ഥാനമായി പശ്ചിമ ബംഗാളിനെ തിരഞ്ഞെടുത്തു. കൂടാതെ ചത്തീസ്ഗഢ് , രാജസ്ഥാന്‍ എന്നീ സംസ്ഥാനങ്ങള്‍ മികച്ച നിലവാരം പുലര്‍ത്തിയെന്ന് ആരോഗ്യമന്ത്രാലയം വ്യക്തമാക്കി. കക്ഷയ രോഗ നിയന്ത്രണ പരിപാടിയില്‍ ആന്ധ്രാപ്രദേശും അരുണാചല്‍ പ്രദേശും കാര്യക്ഷമമായി പ്രവര്‍ത്തിച്ചുവെന്ന് ആരോഗ്യമന്ത്രാലയം കൂട്ടിച്ചേര്‍ത്തു.