ദുബായിൽ 20000 കോടി രൂപയുടെ തട്ടിപ്പ്: അന്വേഷണം കേരളത്തിലും

കൊച്ചി: കോടികളുടെ വായ്പാതട്ടിപ്പ് നടത്തി കേരളത്തിലേയ്ക്ക് കടന്ന മലയാളികളായ ബിസിനസുകാര്‍ക്കെതിരെ നിയമനടപടിയ്ക്കായി ദുബായ് ആസ്ഥാനമായ ബാങ്ക് ഇന്ത്യയിലെ കുറ്റാന്വേഷണ ഏജൻസികളുടെ സഹായം തേടി. കേരളത്തിൽ ഇതിന്‍റെ അടിസ്ഥാനത്തിൽ 27 കേസുകള്‍ രജിസ്റ്റര്‍ ചെയ്തു കഴിഞ്ഞു. പ്രതികളിൽ 40 പേര്‍ മലയാളികളാണ്. രക്തചന്ദനം കടത്തിയ കേസിലെ പ്രതിയായ കണ്ണൂര്‍ സ്വദേശിയും ഇക്കൂട്ടത്തിലുണ്ട്. വായ്പയായെടുത്ത 800 കോടി രൂപ ഹവാലയായി ഇന്ത്യയിലേയ്ക്ക് കടത്തിയെന്നാണ് നിഗമനം.

ബാങ്കിന്‍റെ പവര്‍ ഓഫ് അറ്റോര്‍ണിയായ സ്ഥാപനം ഡിജിപിയ്ക്കാണ് പരാതി നല്‍കിയത്. ഇതോടൊപ്പം തട്ടിപ്പിനിരയായ അഞ്ച് വിദേശബാങ്കുകള്‍ കൂടി നിയമനടപടിയ്ക്ക് ഒരുങ്ങുകയാണെന്നാണ് റിപ്പോര്‍ട്ട്. ഇതോടെ മൊത്തം തട്ടിപ്പ് 20000 കോടി രൂപ കടന്നേക്കും.

ബിസിനസ് ആവശ്യത്തിനെന്ന പേരിൽ വ്യാജരേഖകളുപയോഗിച്ച് മാസ്റ്റര്‍ ഫെസിലിറ്റി സംവിധാനത്തിൽ സംഘടിപ്പിച്ച വായ്പയാണ് ഹവാലയായി ഇന്ത്യയിലേയ്ക്ക് കടത്തിയത്. ആദ്യവായ്പ കൃത്യസമയത്ത് തിരിച്ചടച്ച് വിശ്വാസ്യത സംഘടിപ്പിച്ച ശേഷമായിരുന്നു തട്ടിപ്പ്. ഇതിനാൽ തട്ടിപ്പിനിരയായ ബാങ്കുകള്‍ ഇവരെക്കുറിച്ച് വിശദമായ അന്വേഷണം നടത്തിയിരുന്നില്ല.

കമ്പനിയുടെ ഒരേ ഓഡിറ്റ് റിപ്പോര്‍ട്ട് ഉപയോഗിച്ച് ചിലര്‍ പത്തുബാങ്കുകളിൽ നിന്നുവരെ വായ്പ നേടിയിട്ടുണ്ട്. ഒഡിറ്റ് റിപ്പോര്‍ട്ടിന്‍റെ 30 ശതമാനം വരെയാണ് വായ്പയായി തരപ്പെടുത്തിയിരിക്കുന്നത്. ഇത്തരത്തിൽ ഓഡിറ്റ് റിപ്പോര്‍ട്ട് പ്രകാരമുള്ള ആസ്തിയുടെ മൂന്നിരട്ടിവരെ പണം സമ്പാദിച്ച കമ്പനികളുണ്ട്. ഓഡിറ്റ് റിപ്പോര്‍ട്ട് വ്യാജമാണോ എന്നും അന്വേഷണം നടക്കുന്നുണ്ട്.

ദുബായിലുള്ള സ്വത്തുക്കള്‍ അവിടെത്തന്നെ വിറ്റഴിച്ച്, വായ്പയായി ലഭിച്ച പണം ഹവാല വഴി ഇന്ത്യയിലേയ്ക്ക് കടത്തിയെന്നാണ് പ്രാഥമികനിഗമനം. തട്ടിപ്പ് തിരിച്ചറിഞ്ഞ ബാങ്കുകള്‍ പരാതി നല്‍കി യാത്രാവിലക്ക് ഏര്‍പ്പെടുത്തുന്നതിനു മുന്‍പേ പ്രതികള്‍ രാജ്യം വിട്ടിരുന്നു. ഇന്ത്യയ്ക്കു പുറമെ മറ്റ് ഏഷ്യൻ രാജ്യങ്ങളിൽ നിന്നുള്ളവരും പ്രതികളായുണ്ട്. ഇന്ത്യൻ നിയമപ്രകാരം ഇന്ത്യൻ പൗരൻ വിദേശത്ത് കുറ്റം ചെയ്താലും ഇന്ത്യയിൽ വിചാരണ ചെയ്ത് ശിക്ഷ നടപ്പാക്കാനാകും.