ജനങ്ങള്‍ തന്നെ വേണ്ടെന്നു പറഞ്ഞാല്‍ മാത്രം വിവാഹം: ഇറോം ശർമിള

ഇംഫാൽ: പതിനാറു വര്‍ഷം നീണ്ടു നിന്ന നിരാഹാര സത്യഗ്രം അവസാനിപ്പിച്ച ഇറോം ശർമിള ഇനി രാഷ്ട്രീയത്തിലേക്കെന്നു നേരത്തെ സൂചിപ്പിച്ചിരുന്നു. ശർമിള വിവാഹം കഴിക്കുമെന്നും വാർത്തകൾ ഉണ്ടായിരുന്നു. എന്നാൽ തന്‍റെ രാഷ്ട്രീയപ്രവർത്തനം ജനങ്ങൾ വേണ്ടെന്നു പറഞ്ഞാല്‍ മാത്രമേ വിവാഹം കഴിക്കൂ എന്ന് ശർമിള തുറന്നു പറഞ്ഞു.

ജനങ്ങൾ തന്നെ അവഗണിച്ച്, അവർക്കു തന്നെ ആവശ്യമില്ല എന്ന് തുറന്നു സമ്മതിച്ചാൽ മാത്രമേ പുതിയൊരു ജീവിതത്തെ കുറിച്ച് ചിന്തിക്കൂ എന്ന് ഇറോം ശർമിള കണ്ണീരോടെ പറഞ്ഞു. ഇപ്പോൾ ശർമിള തങ്ങുന്ന ആശുപത്രിയിൽ നിന്ന് പുറത്തു വന്നാൽ ഇനി എവിടെ തങ്ങുമെന്നുള്ള കാര്യവും വ്യക്തമല്ല.

2017ൽ നടക്കുന്ന തെരഞ്ഞെടുപ്പിൽ തൗബാൽ മണ്ഡലത്തിൽ നിന്നും മത്സരിക്കുമെന്ന് അവർ വ്യക്തമാക്കി. മണിപ്പൂർ മുഖ്യമന്ത്രി ഒക്രാം ഇബോബി സിങിന്‍റെ മണ്ഡലമാണത്. അതെ സമയം ശർമിളയെ, പറഞ്ഞു മനസു മാറ്റി രാഷ്ട്രീയത്തിലേക്ക് തള്ളി വിടാനുള്ള സർക്കാരിന്‍റെ ശ്രമമായിരുന്നു ഇതിന്‍റെയെല്ലാം പിന്നിലെന്ന് ശർമിള കൻബ ലുപ് (ശര്‍മിളയെ രക്ഷിക്കൂ) സംഘടനയിലെ പ്രവർത്തകർ ആരോപിച്ചു.