ഇറോം ശര്‍മിളക്ക് മുന്നില്‍ ഇനി രാഷ്ട്രീയ പ്രവേശം; വിവാഹവും

ഇംഫാല്‍: ഇറോം ചാനു ശർമിളയുടെ 16 വർഷം നീണ്ട നിരാഹാര സമരം ഇന്നു സമാപിക്കും. ലോകമെങ്ങും ജനകീയ സമരങ്ങള്‍ക്ക് പ്രചോദനമായ ഇറോം ഇന്ന് ജയില്‍ മോചിതയാകും. താന്‍ നിരാഹാരസമരം അവസാനിപ്പിക്കുകയാണെന്നും ഇനി രാഷ്ട്രീയത്തിൽ പ്രവേശിക്കാനാണ് ഉദ്ദേശമെന്നും രണ്ടാഴ്ച മുൻപ് ഇറോം പ്രഖ്യാപിച്ചിരുന്നു. സമരം അവസാനിപ്പിക്കുന്നതിനെതിരെ രണ്ടു തീവ്രവാദ സംഘടനകൾ രംഗത്തെത്തിയ പശ്ചാത്തലത്തിൽ ശര്‍മിളയെ ഇന്ന് മോചിപ്പിക്കുമോ എന്ന കാര്യത്തില്‍ അന്തിമ തീരുമാനമെടുത്തിട്ടില്ല.

ഇന്നലെ ഇംഫാലിനു സമീപം രണ്ടിടത്ത് ബോംബ് സ്‌ഫോടനം ഉണ്ടായി. ഭീകരാക്രമണം തടയുന്നതിനായി ഇംഫാലിൽ വൻ സുരക്ഷാ സംവിധാനങ്ങളാണ് ഒരുക്കിയിട്ടുള്ളത്. രാഷ്ട്രീയത്തിൽ പ്രവേശിച്ചാല്‍ മരണമായിരിക്കും ശിക്ഷയെന്നാണു ഭീകരസംഘടനകളുടെ ഭീഷണി. ഇത് സൈന്യത്തിന്‍റെ തന്ത്രമായിരിക്കാമെന്നും വിലയിരുത്തലുകള്‍ ഉണ്ട്. എന്നാല്‍ ഇറോം വധിക്കപ്പെട്ടാൽ തീവ്രവാദ സംഘടനകൾക്കു പിന്നെ നിലനിൽപ്പില്ലെന്നും ജനം അവരെ ആട്ടിയോടിക്കുമെന്നും ഇറോം ശര്‍മിളയുടെ അടുത്ത സുഹൃത്തും മനുഷ്യാവകാശ പ്രവര്‍ത്തകനുമായ ബബ്ലു ലോയിടോങ്ബാം മാധ്യമങ്ങളോട് പറഞ്ഞു.

പതിനാറു വർഷത്തെ സമരം അവസാനിക്കുകയല്ല അതിനു പുതിയ രൂപമുണ്ടാവുകയാണെന്നും കോൺഗ്രസ് കേന്ദ്രം ഭരിച്ചിരുന്നപ്പോൾ സൈന്യത്തിന്റെ പ്രത്യേകാധികാരങ്ങളെ സംബന്ധിച്ചു പലപ്പോഴായി നടന്ന ചർച്ചകൾ ബിജെപി സർക്കാർ അധികാരത്തിലെത്തിയതോടെ നിശ്ചലമായെന്നും ബബ്ലു കൂട്ടിച്ചേര്‍ത്തു. ഗോവയിൽ വേരുകളുള്ള ബ്രിട്ടിഷ് പൗരനും മനുഷ്യാവകാശ പ്രവർത്തകനുമായ ഡെസ്മണ്ട് കുടിഞ്ഞോയെ ഇറോം ശര്‍മിള വിവാഹം കഴിക്കുമെന്ന് സൂചനകള്‍ ഉണ്ട്. എന്നാല്‍ മണിപ്പുർ സ്വദേശിയല്ലാത്തയാളെ വിവാഹം കഴിക്കരുതെന്ന് തീവ്രവാദസംഘടനകൾ ഇറോമിന് താക്കീത് നൽകിയിട്ടുണ്ട്.