പ്രധാനമന്ത്രിയുമായി കൂടിക്കാഴ്ച; ജഗൻ മോഹൻ റെഡ്ഡി എൻഡിഎയിലേക്ക്?

ന്യൂഡൽഹി: വൈഎസ്ആർ കോൺഗ്രസ് എൻഡിഎയിലേക്കെന്ന് അഭ്യൂഹം. പാർട്ടിയുടെ നേതാവും ആന്ധ്രാ പ്രദേശ് മുഖ്യമന്ത്രിയുമായ ജഗൻ മോഹൻ റെഡ്ഡി പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തുന്നതിന്റെ പശ്ചാത്തലത്തിലാണ് അഭ്യൂഹങ്ങൾ പ്രചരിക്കുന്നതെന്ന് ഹിന്ദുസ്ഥാൻ ടൈംസ് റിപ്പോർട്ട് ചെയ്തു.

തിങ്കളാഴ്ച വൈകിട്ടാണ് ജഗൻ ഡൽഹിക്ക് പുറപ്പെട്ടത്. ചൊവ്വാഴ്ച രാവിലെ 10.30ന് ജഗൻ പ്രധാനമന്ത്രിയുമായി കൂടിക്കാഴ്ച നടത്തും. വൈഎസ്ആർ കോൺഗ്രസിനെ പ്രധാനമന്ത്രി എൻഡിഎയിലേക്ക് ക്ഷണിക്കാൻ സാധ്യതയുണ്ടെന്ന് ജഗൻ പറഞ്ഞു.

Also Read: രാഹുൽ ദേശീയ വാദികളിൽ നിന്നും ട്യൂഷൻ സ്വീകരിക്കണമെന്ന് ഹാഥ്രസ് പ്രതികളെ ന്യായീകരിച്ച ബിജെപി എംഎൽഎ

കഴിഞ്ഞ രണ്ടാഴ്ചയ്ക്കിടെയുള്ള രണ്ടാമത്തെ സന്ദർശനമാണിത്. സെപ്റ്റംബർ 22ന് രണ്ട് ദിവസത്തെ ഡൽഹി സന്ദർശനത്തിന് എത്തിയ ജഗൻ അമിത് ഷായുമായി കൂടിക്കാഴ്ച നടത്തിയിരുന്നു. വൈഎസ്ആർ കോൺഗ്രസിനു മുന്നിൽ കേന്ദ്ര മന്ത്രി സ്ഥാനം അടക്കമുള്ളവ ബിജെപി വെച്ചിട്ടുണ്ടെന്ന് തെരഞ്ഞെടുപ്പ് ഡാറ്റാ അനലറ്റിക്സ് സ്ഥാപനമായ വിഡിപി തിങ്കഴാള്ച ട്വീറ്റ് ചെയ്തിരുന്നു.

22 എംപിമാരുള്ള വൈഎസ്ആർ കോൺഗ്രസ് രാജ്യത്തെ നാലാമത്തെ വലിയ പാർട്ടിയാണ്. ആറ് എംപിമാർ രാജ്യസഭയിലുമുണ്ട്. 2019 മേയിൽ അധികാരത്തിൽ എത്തിയതിനു ശേഷം കേന്ദ്രസർക്കാരുമായി ജഗൻ മോഹൻ റെഡ്ഡി അടുത്ത ബന്ധമാണ് പുലർത്തുന്നത്. കേന്ദ്രസർക്കാരിന്റെ എല്ലാ തീരുമാനങ്ങളേയും ലോക്സഭയിലും രാജ്യ സഭയിലും പാർട്ടി പിന്തുണയ്ക്കുന്നുണ്ട്.