നൂറാമത്തെ ഉപഗ്രഹം വിജയകരമായി വിക്ഷേപിച്ച് ഐഎസ്ആര്‍ഒ

ചെന്നൈ: ഇന്ത്യയുടെ ബഹിരാകാശ ചരിത്രത്തിൽ പുതിയൊരു പൊൻതൂവൽ കൂടി. ഐഎസ്ആര്‍ഒയുടെ നൂറാമത്തെ ഉപഗ്രഹം പിഎസ്എൽവി-സി 40 ബഹിരാകാശത്തേക്ക് കുതിച്ചുയർന്നു. നൂറാമത് ഉപഗ്രഹമായ കാർട്ടോസാറ്റ്–2 ഉൾപ്പെടെ 31 ഉപഗ്രഹങ്ങൾ അടങ്ങുന്നതാണ് പിഎസ്എൽവി-സി 40. രാവിലെ 9.29 ന് ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിൽ നിന്നാണ് വിക്ഷേപണം വിജയകരമായി പൂർത്തീകരിച്ചത്. ഇന്ത്യൻ ബഹിരാകാശ ഗവേഷണ സംഘടനയുടെ നാല്പത്തിരണ്ടാമത്തെ ദൗത്യമാണിത്.

കാര്‍ട്ടോസാറ്റ്‌-2 ശ്രേണിയില്‍പ്പെട്ട മൂന്നാമത്തെ ഉപഗ്രഹത്തിനൊപ്പം വിദേശ രാജ്യങ്ങളിൽ നിന്നുള്ള 28 നാനോ ഉപഗ്രഹങ്ങളും ഇന്ത്യയുടെ രണ്ട് ചെറു ഉപഗ്രഹങ്ങളുമാണ് വിക്ഷേപിച്ചത്. കാലാവസ്ഥാ നിരീക്ഷണത്തിന് വേണ്ടിയുള്ള ഉപഗ്രഹമാണ് കാര്‍ട്ടോസാറ്റ്-2. ഭൂമിയില്‍ നിന്നുള്ള ഏത് വസ്തുവിന്‍റെയും ചിത്രം വ്യക്തയോടെ പകര്‍ത്താനും കൃത്യമായ വിവരങ്ങളും നല്‍കാന്‍ കഴിയുന്ന മള്‍ട്ടിസ്‌പെക്ട്രല്‍ ക്യാമറയാണ് കാര്‍ട്ടോസാറ്റ് ഉപഗ്രഹത്തിന്‍റെ സവിശേഷത.