കര്‍ണാടകയിലേത് ജനാധിപത്യത്തിന്‍റെ വിജയമെന്ന് രജനീകാന്ത്

ചെന്നൈ: കര്‍ണാടകയിൽ സംഭവിച്ചത് ജനാധിപത്യത്തിന്‍റെ വിജയമാണെന്ന് നടൻ രജനീകാന്ത്. സര്‍ക്കാര്‍ രൂപീകരിക്കാൻ ബിജെപി കൂടുതൽ സമയം ആവശ്യപ്പെട്ടതും ഗവര്‍ണര്‍ 15 ദിവസം അനുവദിച്ചതും ജനാധിപത്യത്തെ കളിയാക്കുന്നതിനു തുല്യമായിരുന്നുവെന്ന് അദ്ദേഹം പറഞ്ഞു. ചെന്നൈയിൽ മാധ്യമങ്ങളോടു സംസാരിക്കുകയായിരുന്നു അദ്ദേഹം.

വിഷയത്തിൽ ജനാധിപത്യത്തെ സംരക്ഷിക്കുന്ന വിധി പുറപ്പെടുവിച്ചതിന് സുപ്രീം കോടതിയോട് അദ്ദേഹം നന്ദി പറഞ്ഞു. 2019ലെ ലോക്സഭാ തെരഞ്ഞെടുപ്പിൽ മത്സരിക്കണമോ എന്നതിൽ തെരഞ്ഞെടുപ്പ് പ്രഖ്യാപനത്തിനു ശേഷം തീരുമാനമെടുക്കും. പാര്‍ട്ടിയ്ക്ക് ഇതുവരെ രൂപം നല്‍കിയിട്ടില്ലെങ്കിലും എന്തും നേരിടാൻ സ‍ജ്ജമാണെന്നും അദ്ദേഹം പറഞ്ഞു. ഏതെങ്കിലും മുന്നണിയുമായി സഖ്യം രൂപീകരിക്കണോ എന്ന കാര്യത്തിൽ അഭിപ്രായം പറയാറായിട്ടില്ലെന്നും രജനീകാന്ത് വ്യക്തമാക്കി.