ജമ്മുകശ്മീരില്‍ സ്ഫോടനത്തില്‍ ഒരാള്‍ കൊല്ലപ്പെട്ടു

ജമ്മുകശ്മീര്‍: ആര്‍നിയ സെക്ടറില്‍ വെള്ളിയാഴ്ചയുണ്ടായ സ്ഫോടനത്തില്‍ ഒരാള്‍ കൊല്ലപ്പെട്ടതായി റിപ്പോര്‍ട്ട്. ആറു പേര്‍ക്ക് പരിക്കേറ്റിട്ടുണ്ട്.

പഴയ ഷെല്‍ പൊട്ടിത്തെറിച്ചാണ് അപകടം നടന്നതെന്നാണ് പ്രാഥമിക നിഗമനം. ജബോവല്‍ ഗ്രാമത്തില്‍ ബീഹാറില്‍ നിന്നുള്ള തൊഴിലാളികള്‍ ജോലി ചെയ്തു കൊണ്ടിരിക്കുന്ന സമയത്താണ് അപകടം നടന്നത്. ഇവര്‍ ഇവിടെ നെല്‍ച്ചെടികള്‍ നടുമ്പോഴായിരുന്നു സ്ഫോടനം നടന്നത്.

സംഭവത്തെക്കുറിച്ച് കൂടുതല്‍ അന്വേഷണങ്ങള്‍ നടന്നുകൊണ്ടിരിക്കുകയാണ്. ഈ വര്‍ഷം മെയില്‍ ഇതേ പ്രദേശത്ത് പാകിസ്ഥാന്‍ ഷെല്ലാക്രമണം അഴിച്ചു വിട്ടിരുന്നു. ഇതുമൂലം പോലീസുകാര്‍ അടക്കമുള്ള നിരവധി പേര്‍ക്ക് പരിക്കേല്‍ക്കുകയും ചെയ്തിരുന്നു.