ലോക്സഭാ തിരഞ്ഞെടുപ്പ് നേരത്തെയാക്കില്ലെന്ന് അരുൺ ജെയ്റ്റ്ലി

ന്യൂഡൽഹി: തിരഞ്ഞെടുപ്പുകള്‍ ഒന്നിച്ചു നടത്തുന്നതു സംബന്ധിച്ച് നിലപാട് വ്യക്തമാക്കി ധനമന്ത്രി അരുൺ ജയ്റ്റലി. നിയമസഭാ തിരഞ്ഞെടുപ്പുകള്‍ക്കൊപ്പം ലോക്സഭാ തിരഞ്ഞെടുപ്പും നടത്തണമെന്ന ആവശ്യമുയരുന്ന സാഹചര്യത്തിലും അതിതുവേണ്ടി ലോക്സഭാ തിരഞ്ഞെടുപ്പ് നേരത്തെയാക്കില്ലെന്ന നിലപാടാണ് ധനമന്ത്രിയുടേത്. ഈ വര്‍ഷം അവസാനം നടക്കുന്ന മധ്യപ്രദേശ്, രാജസ്ഥാൻ, ഛത്തീസ്ഗഢ് തിരഞ്ഞെടുപ്പുകള്‍ക്കൊപ്പം ലോക്സഭാ തിരഞ്ഞെടുപ്പുകൂടി നടത്തുമെന്ന് അഭ്യൂഹങ്ങൾ ഉയര്‍ന്നിരുന്നു.

രാജ്യത്തെ തിരഞ്ഞെടുപ്പുകള്‍ ഒന്നിച്ചു നടത്തുന്നതു സംബന്ധിച്ച് രാഷ്ട്രപതി റാംനാഥ് കോവിന്ദും പ്രധാനമന്ത്രി നരേന്ദ്ര മോദിയും നിയമമന്ത്രി രവിശങ്കര്‍ പ്രസാദും നിരന്തമായി ആവശ്യമുന്നയിക്കുന്നുണ്ട്. എന്നാൽ അത്തരം ഒരു സാധ്യതയേ ഇല്ലെന്ന് അരുൺ ജെയ്റ്റ്ലി പറഞ്ഞു. ലോക്സഭാ തിരഞ്ഞെടുപ്പിനായി നയമസഭാ തിരഞ്ഞെടുപ്പുകള്‍ നീട്ടിക്കൊണ്ടു പോകാനുള്ള സാധ്യതയുമില്ല.

ഭരണഘടനയിൽ വ്യത്യാസം വരുത്താതെ നിയമസഭാ തിരഞ്ഞെടുപ്പുകളും ലോക്സഭാ തിരഞ്ഞെടുപ്പും ഒന്നിച്ചു നടത്താനാവില്ലെന്ന് ജയ്റ്റ്ലി പറഞ്ഞു. ഒന്നിച്ചു നടത്തുന്നതിനായി ലോക്സഭാ തിരഞ്ഞെടുപ്പ് നേരത്തെയാക്കുന്നതിനെ പ്രതിപക്ഷ പാര്‍ട്ടികളും പിന്തുണയിക്കില്ലെന്നാണ് കരുതുന്നതെന്നും അദ്ദേഹം കൂട്ടിച്ചേര്‍ത്തു. ചെലവു കുറയ്ക്കുന്നതിനും പ്രവര്‍ത്തനങ്ങള്‍ ഏകീകരിക്കുന്നതിനുമായി തിരഞ്ഞെടുപ്പുകള്‍ ഒന്നിച്ചു നടത്തണമെന്നാണ് തിരഞ്ഞെടുപ്പ് കമ്മീഷൻ ആവശ്യപ്പെടുന്നത്.