മാധ്യമങ്ങള്‍ തന്നെ വേട്ടയാടുകയാണെന്ന് വിശ്വാസികളോട് ജലന്ധര്‍ ബിഷപ്പ്

ന്യൂഡൽഹി: മാധ്യമങ്ങള്‍ തന്നെ വേട്ടയാടുകയാണെന്നും ജനങ്ങള്‍ തന്നെപ്പറ്റിയുള്ള വാര്‍ത്തകള്‍ വിശ്വസിക്കരുതെന്നും ജലന്ധര്‍ ബിഷപ്പ് ഫ്രാങ്കോ മുളയ്ക്കൽ. രൂപതയുടെ മുഖപത്രമായ സാഡാ സമാനയിലൂടെയാണ് വിശ്വാസികള്‍ക്ക് ബിഷപ്പ് സന്ദേശം നല്‍കിയത്.

മുഖപത്രത്തിന്‍റെ മുൻപേജിൽ തന്നെ ബിഷപ്പിന്‍റെ സന്ദേശം രേഖപ്പെടുത്തിയിട്ടുണ്ട്. എന്നാൽ സന്ദേശത്തിൽ കന്യാസ്ത്രിയുടെ പരാതിയെപ്പറ്റി നേരിട്ട് പരാമര്‍ശമില്ല. രൂപതയിലെ വിവിധ കുടുംബയൂണിറ്റുകള്‍ വഴിയാണ് വിശ്വാസികള്‍ക്ക് പത്രം വിതരണം ചെയ്യുന്നത്.

പ്രതിസന്ധിഘട്ടങ്ങളെ തരണം ചെയ്യാൻ വിശ്വാസികളുടെ സഹായം തുടര്‍ന്നും വേണമെന്നും ബിഷപ്പെന്ന നിലയിലുള്ള തന്‍റെ ജോലി ഉത്തരവാദിത്തത്തോടെ ചെയ്യുമെന്നും സന്ദേശത്തിൽ പറയുന്നു.

ബിഷപ്പ് ഫ്രാങ്കോ മുളയ്ക്കലാണ് മുഖപത്രത്തിന്‍റെ രക്ഷാധികാരി. വൈദികനായ ആന്‍റണി ജോസഫ് ചീഫ് എഡിറ്ററായ പത്രം അച്ചടിച്ചിരിക്കുന്നത് ശാന്തിപുരയിലെ മിഷൻ പ്രസിലാണ്.