ജനാ‍ർദ്ദന റെഡ്ഡിയെ ജുഡീഷ്യൽ കസ്റ്റഡിയിൽ വിട്ടു

ബംഗളുരു: സാമ്പത്തിക തട്ടിപ്പു കേസിൽ അറസ്റ്റിലായ മുൻ കർണ്ണാടക മന്ത്രിയും ഖനിരാജാവുമായ ജനാർദ്ദന റെഡ്ഡിയെ ജുഡീഷ്യൽ കസ്റ്റഡിയിൽവിട്ടു. രണ്ടാഴ്ചയാണ് കസ്റ്റഡി കാലാവധി. ഇരുപത് മണിക്കൂർ നീണ്ട ചോദ്യംചെയ്യലിനൊടുവിലാണ് ജനാർദ്ദന റെഡ്ഡിയേയും സുഹൃത്ത് അലിഖാനെയും ബംഗളുരു സെൻട്രൽ ക്രൈം ബ്രാഞ്ച് അറസ്റ്റ് ചെയ്തതത്.

മന്ത്രിയായിരിക്കെ ധനകാര്യ സ്ഥാപനത്തിൽനിന്നും 18 കോടി രൂപ കോഴവാങ്ങിയെന്നതാണ് കേസ്. കോഴ വാങ്ങിയതിന് തെളിവ് ലഭിച്ചതായി ക്രൈം ബ്രാഞ്ച് അറിയിച്ചു. ഇന്നലെയാണ് റെഡ്ഡി അന്വേഷണ ഉദ്യഗസ്ഥർക്കു മുന്നിൽ കീഴടങ്ങിയത്.

ഞായറാഴ്ച പുലർച്ചെ വരെ റെഡ്ഡിയെ ചോദ്യം ചെയ്തുവെന്നാണ് റിപ്പോർട്ടുകൾ. ബുധനാഴ്ചയാണ് റെഡ്ഡിക്കെതിരെ അന്വേഷണം ആരംഭിച്ചത്. മുൻകൂർ ജാമ്യാപേക്ഷ തള്ളിയതിനെത്തുടർന്നാണ് റെഡ്ഡി നാടകീയമായി പോലീസിനു മുന്നിൽ കീഴടങ്ങിയത്.