ന്യൂഡൽഹി: ഗുജറാത്ത് തെരഞ്ഞെടുപ്പിൻ്റെ എക്സിറ്റ് പോൾ ഫലങ്ങൾ അബദ്ധമാണെന്ന് ദളിത് നേതാവും വഡ്ഗാം മണ്ഡലത്തിലെ സ്ഥാനാർത്ഥിയുമായ ജിഗ്നേഷ് മേവാനി. 'എക്സിറ്റ് പോൾ ഫലങ്ങൾ അബദ്ധമാണ്. ഇത്തവണ ബി ജെ പി എന്തായാലും പരാജയപ്പെടും. ബി ജെ പി ഇത്തവണ സർക്കാർ രൂപീകരിക്കില്ല' - ജിഗ്നേഷ് മേവാനി പറഞ്ഞു.
തിങ്കളാഴ്ച ഗുജറാത്ത് തെരഞ്ഞെടുപ്പ് ഫലം വരാനിരിക്കെയാണ് ഞായറാഴ്ച ജിഗ്നേഷ് മേവാനിയുടെ പ്രതികരണം. വഡ്ഗാം മണ്ഡലത്തിലെ റീ പോളിങ് നടക്കുന്ന ബൂത്തുകളിൽ ഇന്ന് എത്തിയപ്പോഴാണ് മേവാനി ഇങ്ങനെ പറഞ്ഞത്. വെള്ളിയാഴ്ച ആയിരുന്നു തെരഞ്ഞെടുപ്പ് കമ്മീഷൻ രണ്ടാംഘട്ടം തെരഞ്ഞെടുപ്പ് നടന്നതിൽ ആറു ബൂത്തുകളിൽ റീ പോളിങ് പ്രഖ്യാപിച്ചത്. സാങ്കേതിക തകരാറിനെ തുടർന്നാണ് റീ പോളിങ് പ്രഖ്യാപിച്ചത് എന്നായിരുന്നു തെരഞ്ഞെടുപ്പു കമ്മീഷൻ്റെ വിശദീകരണം.
ബൻസ്കന്ത ജില്ലയിലെ വഡ്ഗാം മണ്ഡലത്തിൽ സ്വതന്ത്ര സ്ഥാനാർത്ഥിയായാണ് ജിഗ്നേഷ് മേവാനി
മൽസരിക്കുന്നത്. അതേസമയം, മേവാനിക്ക് കോൺഗ്രസിൻ്റെ പിന്തുണയുണ്ട്. ഇവിടെ കോൺഗ്രസ് സ്ഥാനാർത്ഥിയെ നിർത്തിയിട്ടുമില്ല.