കശ്മീരില്‍ സുരക്ഷാ സേനക്കെതിരെ കല്ലെറിഞ്ഞവരുടെ കേസ് പിന്‍വലിക്കുന്നു

ന്യൂഡല്‍ഹി: കശ്മീരില്‍ സുരക്ഷാ സേനയ്‌ക്കെതിരെ കല്ലെറിഞ്ഞവര്‍ക്കെതിരെയുളള കേസുകള്‍ പിന്‍വലിക്കുന്നു. കശ്മീര്‍ പ്രശ്‌നം പരിഹരിക്കുന്നതിനായി കേന്ദ്രസര്‍ക്കാര്‍ നിയോഗിച്ച പ്രതിനിധി ദിനേശ്വര്‍ ശര്‍മ ഇതുസംബന്ധിച്ച നിര്‍ദ്ദേശം കേന്ദ്രസര്‍ക്കാരിന് നല്‍കി. 4500 യുവാക്കള്‍ക്കെതിരെയുള്ള കേസുകളാണ് പിന്‍വലിക്കാന്‍ നിര്‍ദ്ദേശം നല്‍കിയിട്ടുള്ളത്.

ഈ മാസം ആദ്യം ദിനേശ്വര്‍ ശര്‍മ കശ്മീര്‍ സന്ദര്‍ശിച്ചിരുന്നു. സന്ദര്‍ശനത്തിനിടെ നിരവധി ആളുകളുമായി നടത്തിയ കൂടിക്കാഴ്ചക്കിടെ കേസുകള്‍ പിന്‍വലിക്കണമെന്ന ആവശ്യം ഉയരുകയും ചെയ്തിരുന്നു. ഹിസ്ബുള്‍ ഭീകരന്‍ ബുര്‍ഹാന്‍ വാണിയെ സുരക്ഷാ സേന വധിച്ചതിന് പിന്നാലെ പൊട്ടിപ്പുറപ്പെട്ട പ്രതിഷേധത്തിനിടെയാണ് സുരക്ഷാ സേനയ്‌ക്കെതിരെ വ്യാപകമായി കല്ലേറുണ്ടായത്.

11,500 കേസുകളാണ് സുരക്ഷാ സേനയ്‌ക്കെതിരായ കല്ലേറുമായി ബന്ധപ്പെട്ട് രജിസ്റ്റര്‍ ചെയ്തിട്ടുള്ളത്. ഇതില്‍ യുവാക്കള്‍ക്കെതിരായ 4500 കേസുകള്‍ ആദ്യഘട്ടത്തില്‍ പിന്‍വലിക്കാനാണ് നിര്‍ദ്ദേശം.