ലൈംഗിക അതിക്രമം; ജെഎന്‍യു പ്രൊഫസര്‍ അറസ്റ്റില്‍

ന്യൂഡല്‍ഹി: അധ്യാപകന്‍ ലൈംഗികമായി ഉപദ്രവിക്കുന്നുവെന്ന വിദ്യാര്‍ഥിനികളുടെ പരാതിയിൽ ജെ.എന്‍.യു പ്രൊഫസര്‍ അതുല്‍ ജോഹ്രിയെ ഡല്‍ഹി പോലീസ് അറസ്റ്റുചെയ്തു. ഇക്കാര്യം സ്ഥിരീകരിച്ച സൗത്ത് വെസ്റ്റ് ഡി.സി.പി പ്രൊഫസറെ കോടതിയില്‍ ഹാജരാക്കിയതായി അറിയിച്ചു.

വിദ്യാര്‍ഥികള്‍ കഴിഞ്ഞ ദിവസം അതുല്‍ ജോഹ്രിയെ അറസ്റ്റു ചെയ്യണമെന്ന് ആവശ്യപ്പെട്ട് വസന്ത് കുഞ്ജ് പോലീസ് സ്റ്റേഷനിലേക്ക് മാര്‍ച്ച്‌ നടത്തിയിരുന്നു. മാര്‍ച്ചിനിടെ സംഘര്‍ഷമുണ്ടായതിനെത്തുടര്‍ന്ന് പോലീസ് ജലപീരങ്കി പ്രയോഗിക്കുകയും ചെയ്തു. പ്രൊഫസര്‍ക്കെതിരേ പോലീസില്‍ പരാതി നല്‍കിയത് ജെ.എന്‍.യുവിലെ ഗവേഷണ വിദ്യാര്‍ഥിനി അടക്കമുള്ളവരാണ്. ഇതിന്റെ അടിസ്ഥാനത്തില്‍ പോലീസ് കേസെടുത്തിരുന്നു.

പ്രൊഫസര്‍ക്കെതിരെ ഗവേഷണ വിദ്യാര്‍ഥിനി ഉന്നയിച്ചത് അശ്ലീലച്ചുവയോടെ സംസാരിക്കുന്നുവെന്നും ശരീരത്തില്‍ അനുമതിയില്ലാതെ സ്പര്‍ശിക്കുന്നുവെന്നും അടക്കമുള്ള പരാതികളാണ്. ഇതിനു പിന്നാലെ പ്രൊഫസര്‍ക്കെതിരെ പരാതിയുമായി എട്ട് വിദ്യാര്‍ഥിനികള്‍ രംഗത്തെത്തിയിട്ടുമുണ്ടായിരുന്നു.