ചീഫ് ജസ്റ്റിസുമായി ചർച്ചക്ക് തയ്യാറെന്ന് ജസ്റ്റിസ് ചെലമേശ്വർ

ന്യൂഡൽഹി: സുപ്രീം കോടതി ചീഫ് ജസ്റ്റിസ് ദീപക് മിശ്രയുമായി ചർച്ചക്ക് തയ്യാറെന്ന് ജസ്റ്റിസ് ചെലമേശ്വർ. ചർച്ചയിൽ തങ്ങൾ ഉന്നയിച്ച വിഷയങ്ങൾ ഉണ്ടാകണമെന്ന് ചെലമേശ്വർ ആവശ്യപ്പെട്ടു. സുപ്രീം കോടതി ബാർ കൗൺസിൽ പ്രതിനിധികളോട് ചെലമേശ്വർ അറിയിച്ചതാണ് ഇത്. കൂടാതെ, തങ്ങളുടെ പ്രതിഷേധവും തർക്കവും കോടതിയുടെ പ്രവർത്തനത്തെ ബാധിക്കില്ലെന്ന് ജസ്റ്റിസ് ചെലമേശ്വർ വ്യക്തമാക്കി. പ്രശ്‌നം പരിഹരിച്ച് സമവായത്തിലെത്തിക്കാൻ ബാർ കൗൺസിൽ അംഗങ്ങൾ നടത്തുന്ന ചെലമേശ്വറുമായി നടത്തിയ ചർച്ചയിലാണ് അദ്ദേഹം ഈ കാര്യങ്ങൾ വ്യക്തമാക്കിയത്.

പ്രതിഷേധത്തിൽ തന്നോടൊപ്പം പങ്കെടുത്ത മറ്റ് ജഡ്‌ജിമാരോടും കൂടിയാലോചിച്ച ശേഷം നിലപാട് വ്യക്തമാക്കാമെന്നും ചെലമേശ്വർ വ്യക്തമാക്കി. സുപ്രീം കോടതി ബാർ കൗൺസിൽ നിയോഗിച്ച ഏഴംഗ സമിതി ഇന്ന് വൈകിട്ട് ചീഫ് ജസ്റ്റിസ് ദീപക് മിശ്രയുമായി ചർച്ച നടത്താനിരിക്കെയാണ് ചെലമേശ്വറിന്‍റെ പ്രതികരണം. ചീഫ് ജസ്റ്റിസിനെതിരെ നാല് മുതിർന്ന ജഡ്‌ജിമാർ ഉന്നയിച്ച വിമർശനത്തോട് പരോക്ഷമായി കൗൺസിലും യോജിച്ചിരുന്നു. ജസ്റ്റിസ് ലോയയുടെ ദുരൂഹമരണവുമായി ബന്ധപ്പെട്ടതുൾപ്പടെയുള്ള പൊതു താൽപര്യ ഹർജികൾ ചീഫ് ജസ്റ്റിസിനോ കൊളീജിയത്തിലെ മാറ്റ് നാല് ജഡ്‌ജിമാർ അധ്യക്ഷരായ ഏതെങ്കിലും ബെഞ്ചിനോ വിടണമെന്ന് എസ്‌സിബിഐ ആവശ്യപ്പെട്ടു.