'പ്രദ്യുമന്‍റെ കൊലയാളിക്ക് പശ്ചാത്താപമേ ഇല്ലായിരുന്നു'

ന്യൂഡല്‍ഹി: ഗുരുഗ്രാമില്‍ എട്ടുവയസുകാരനെ കഴുത്തറത്ത് കൊലപ്പെടുത്തിയ പ്ലസ് വണ്‍ വിദ്യാര്‍ഥി യാതൊരു പശ്ചാത്താപവും പ്രകടിപ്പിച്ചിരുന്നില്ലെന്ന് സിബിഐ വൃത്തങ്ങള്‍.

സുഹൃത്തുക്കളുടെയോ വീട്ടുകാരുടെയോ മുന്നില്‍ അസ്വാഭാവികമായ ഒരു പെരുമാറ്റവും ഈ കുട്ടിയില്‍ നിന്നുണ്ടായില്ല. പ്രദ്യുമനെ കൊലപ്പെടുത്തിയത് ആരോടും വെളിപ്പെടുത്തിയുമില്ല. ഉറ്റസുഹൃത്തുക്കള്‍ക്കുപോലും ഇതേക്കുറിച്ച് അറിയില്ലായിരുന്നുവെന്ന് സിബിഐ വൃത്തങ്ങള്‍ ടൈംസ് ഓഫ് ഇന്ത്യയോട് പറഞ്ഞു.

കൊലപാതകത്തിന് ഇയാള്‍ ശേഷം ദിവസേന സ്കൂളില്‍ എത്തുകയും സുഹൃത്തുക്കള്‍ക്കൊപ്പം സമയം ചെലവഴിക്കുകയും ചെയ്‍തിരുന്നു. പ്രദ്യുമന്‍ ചോരയില്‍ കുളിച്ചുകിടന്നത് ആദ്യം തോട്ടക്കാരനെ അറിയിച്ചത് ഈ വിദ്യാര്‍ഥിയാണ്.

സാക്ഷിമൊഴികള്‍ അറിയാന്‍ നാല് തവണ പോലീസ്, സിബിഐ ഉദ്യോഗസ്ഥര്‍ ഇതിന് മുന്‍പ് ഈ വിദ്യാര്‍ഥിയെ ചോദ്യം ചെയ്‍തതുമാണ്. അപ്പോഴൊന്നും കൊലപാതകം നടത്തിയതിനെക്കുറിച്ച് ഇയാള്‍ സമ്മതിക്കുകയോ സൂചന നല്‍കുകയോ ചെയ്‍തിരുന്നില്ല.