ലോക്ക് ഡൗണിനിടെ കാറില്‍ കറങ്ങി അപകടം; പോലീസിനോട് കള്ളം പറഞ്ഞ് നടി, ഒടുവില്‍ കുടുങ്ങി

ബെംഗളൂരു: ലോക്ക് ഡൗണിനിടെ കാറുമായി കറങ്ങാനിറങ്ങിയ കന്നഡ നടിയും സുഹൃത്തും അപകടത്തില്‍പ്പെട്ടു. കന്നട നടി ഷര്‍മിള മാന്ദ്രെയും സുഹൃത്ത് കെ ലോകേഷ് വസന്തും സഞ്ചരിച്ച വാഹനമാണ് അപകടത്തില്‍പ്പെട്ടത്. ബെംഗളൂരുവില്‍ ശനിയാഴ്ച അര്‍ധരാത്രിയായിരുന്നു സംഭവം.

Also Read: കാസർകോട് വീണ്ടും ചികിത്സ കിട്ടാതെ മരണം

വസന്ത് നഗറിനടുത്ത് ഇരുവരും സഞ്ചരിച്ച കാര്‍ തൂണില്‍ ഇടിക്കുകയായിരുന്നു. തുടര്‍ന്ന്, കാര്‍ പോലീസ് പിടിച്ചെടുത്തു. നടിയുടെ മുഖത്തും സുഹൃത്തിന്റെ കൈയ്ക്കും പൊട്ടലുണ്ടായിരുന്നു. എന്നാല്‍, അപകടം നടന്നത് ജയനഗറിലാണെന്നാണു ആദ്യം ഇരുവരും പറഞ്ഞത്. എന്നാല്‍, വസന്ത് നഗറിലാണ് അപകടം ഉണ്ടായതെന്നു പോലീസിനു മനസ്സിലായി.

Also Read: വിളക്ക് തെളിയിക്കലിനു പിന്നില്‍ മോദിയുടെ തന്ത്രം മറ്റൊന്നോ? വ്യത്യസ്ത ആരോപണവുമായി എച് ഡി കുമാരസ്വാമി

തെറ്റായ വിവരം നല്‍കി കാര്‍ കടത്താന്‍ ശ്രമം നടന്നതായാണ് പോലീസ് സംശയിക്കുന്നത്. അപകടം നടന്നയുടനെ വാഹനത്തില്‍ ഉണ്ടായിരുന്ന രണ്ടു പേരെയും ആശുപത്രിയില്‍ പ്രവേശിപ്പിച്ചു. അപകടം നടന്ന സ്ഥലത്ത് പോലീസെത്തിയപ്പോള്‍ അവിടെ ഉണ്ടായിരുന്ന ഒരാള്‍ താനാണ് കാര്‍ ഓടിച്ചതെന്ന് അവകാശപ്പെട്ടിരുന്നു. എന്നാല്‍, പോലീസ് രേഖകള്‍ ഹാജരാക്കാന്‍ ആവശ്യപ്പെട്ടതോടെ മൊഴി മാറ്റുകയായിരുന്നു. അശ്രദ്ധയും അപകടകരമായി വാഹനമോടിച്ചതിന് ഐപിസി സെക്ഷന്‍ 279, 337 വകുപ്പുകള്‍ പ്രകാരം പോലീസ് കേസെടുത്തിട്ടുണ്ട്.