നിർണായക ചർച്ചകൾക്കായി കുമാരസ്വാമി സിംഗപ്പൂരിൽ

ബെംഗലൂരു: വോട്ടെടുപ്പ് അവസാനിച്ച കർണാടകയിൽ ത്രിശങ്കു സർക്കാർ നിലവിൽ വരുമെന്ന എക്‌സിറ്റ് പോൾ സൂചനകളെ തുടർന്ന് ശ്രദ്ധാകേന്ദ്രമായി മാറുകയാണ് മുൻ മുഖ്യമന്ത്രി എച്ച്.ഡി.കുമാരസ്വാമി. താൻ കർണാടകയുടെ രാജാവ് തന്നെയാകുമെന്ന വാക്കുകൾ ഉയർത്തിക്കാട്ടിയായിരുന്നു കുമാരിസ്വാമിയുടെയും ജനതാ ദള്ളിന്‍റെയും പ്രചാരണം. ഭരിക്കാൻ ആവശ്യമായ സീറ്റുകൾ ബിജെപിക്കും കോൺഗ്രസിനും ലഭിക്കില്ലെന്നും മന്ത്രിസഭാ രൂപീകരണത്തിന് കുമാരസ്വാമിയുടെ പിന്തുണ വേണ്ടി വരുമെന്നുമാണ് സൂചന.

തെരഞ്ഞെടുപ്പ് ഫലം വരുമ്പോൾ ജെഡിഎസ് ആയിരിക്കും നിർണായക ശക്തിയെന്നാണ് എക്‌സിറ്റ് പോൾ ഫലങ്ങൾ സൂചിപ്പിക്കുന്നത്. എന്നാൽ, തെരഞ്ഞെടുപ്പ് ഫലം വരാനിരിക്കെ സിംഗപ്പൂരിലേക്ക് പോയിരിക്കുകയാണ് കുമാരസ്വാമി. ബിജെപി, കോൺഗ്രസ് നേതാക്കൾ ദേവഗൗഡയുമായും കുമാരസ്വാമിയുമായും ചർച്ചകൾ നടത്താൻ ശ്രമിക്കുന്നുണ്ട്. അധികം മാധ്യമ ശ്രദ്ധയില്ലാതെ രാഷ്ട്രീയ ചർച്ചകൾ നടത്താനായാണ് കുമാരസ്വാമി സിംഗപ്പൂരിലേക്ക് പോയതെന്ന് അടുത്ത വൃത്തങ്ങൾ സൂചിപ്പിച്ചതായി ന്യൂസ് 18 റിപ്പോർട്ട് ചെയ്തു. തൂക്ക് മന്ത്രിസഭ വന്നാൽ ബിജെപിയെയാണോ കോൺഗ്രസിനെയാണോ കുമാരസ്വാമി പിന്തുണക്കുക എന്നത് ഇത് വരെ വ്യക്തമല്ല. ബിജെപി പിന്തുണച്ചാൽ കുമാരസ്വാമിയെ പാർട്ടിയിൽ നിന്ന് പുറത്താക്കുമെന്നാണ് പിതാവ് എച്ച്.ഡി.ദേവഗൗഡ നേരത്തെ വ്യക്തമാക്കിയത്.