ലോക്ക് ഡൗണിനിടെ പിറന്നാളാഘോഷിച്ച് കർണാടക ബിജെപി MLA; പങ്കെടുത്തത് നൂറോളമാളുകൾ

ബെംഗളൂരു: രാജ്യം കൊവിഡ് വ്യാപനം തടയാൻ ലോക്ക് ഡൗൺ പ്രഖ്യാപിച്ച് അതീവ ജാഗ്രതയിലൂടെ കടന്ന് പോകുന്നതിനിടെ നിയന്ത്രണങ്ങൾ ലംഘിച്ച് പിറന്നാൾ ആഘോഷവുമായി കർണാടകയിലെ ബിജെപി എംഎൽഎ. തുമകുരു ജില്ലയിലെ തുറുവേകര എംഎൽഎ ആയ എം ജയരാമാണ് നൂറോളമാളുകളെ പങ്കെടുപ്പിച്ച് പിറന്നാൾ ആഘോഷിച്ചത്.

ഇന്നലെ ഗുബ്ലി ടൗണിൽ നടന്ന ആഘോഷത്തിൽ എംഎൽഎ ഗ്ലൗ ധരിച്ചായിരുന്നു വലിയൊരു കേക്ക് മുറിച്ചത്. തുടർന്ന് തന്‍റെ സമീപത്തുണ്ടായിരുന്ന കുട്ടികളടക്കമുള്ളവർക്ക് ഇത് നൽകുകയും ചെയ്തു. എംഎൽഎയ്ക്കരികിൽ ആളുകൾ തിങ്ങി നിറഞ്ഞ് നിൽക്കുന്നതും വീഡിയോകളിലും ചിത്രങ്ങളിലും വ്യക്തമാണ്.

Also Read: സംസ്ഥാനത്ത് കൊവിഡ് ചികിത്സയിലായിരുന്ന മാഹി സ്വദേശി മരിച്ചു

രാജ്യത്ത് 200 ൽ അധികം ആളുകൾ മരിക്കുകയും ഏഴായിരത്തിൽപരം ആളുകൾക്ക് രോഗം ബാധിക്കുകയും ചെയ്ത ഗുരുതര സാഹചര്യത്തിലാണ് ജനപ്രതിനിധി തന്നെ നിയന്ത്രണങ്ങൾ ലംഘിച്ചെന്ന വാർത്ത പുറത്തുവരുന്നത്. ഇത്തരത്തിൽ നിയന്ത്രണങ്ങൾ ലംഘിക്കുന്ന കർണാടകയിലെ ആദ്യത്തെ നേതാവുമല്ല ഇദ്ദേഹം. നേരത്തെ കർണാടക മുഖ്യമന്ത്രി ബിഎസ് യെഡ്യൂരപ്പയും വിവാദത്തിൽപ്പെട്ടിരുന്നു.

കഴിഞ്ഞമാസം ആളുകൾ ഒത്തുകൂടുന്ന എല്ലാചടങ്ങുകളും നിരോധിച്ച സമയത്ത് യെഡ്യൂരപ്പ വിവാഹത്തിൽ പങ്കെടുത്തതായിരുന്നു വിവാദത്തിലായത്. ബെൽഗാവിയിൽ മാർച്ച് 15നായിരുന്നു ഇത്. തൊട്ടടുത്തദിവസം തന്നെ സംസ്ഥാനത്തെ കോൺഗ്രസ് പ്രവർത്തകരും നിർദേശങ്ങൾ മറികടന്ന് ഒത്തുചേരുകയും ചെയ്തു. പാർട്ടിയുടെ സംസ്ഥാന അധ്യക്ഷനായി നിയമിതനായ ഡികെ ശിവകുമാറിനെ സ്വീകരിക്കാനായിരുന്നു ഈ ഒത്തുചേരൽ.