ലോക് ഡൗണ്‍ ലംഘിച്ച് ദേശീയപാതയിൽ കുതിര സവാരി; ബിജെപി എം‌എൽ‌എയുടെ മകന്‍റെ വീഡിയോ വൈറല്‍

കർണാടക: ലോക്ക്ഡൗണ്‍ നിയന്ത്രണങ്ങള്‍ ലംഘിച്ച് കർണാടക ബിജെപി എം‌എൽ‌എയുടെ മകൻ ദേശീയപാതയിൽ കുതിര സവാരി നടത്തിയ വീ‍ഡിയോ വൈറലാകുന്നു. കേന്ദ്ര സര്‍ക്കാറും സംസ്ഥാന സര്‍ക്കാറും പുറത്ത് പോകരുതെന്ന് ആവര്‍ത്തിച്ച് ജനങ്ങളോട് അഭ്യർത്ഥിക്കുമ്പോഴാണ് ബിജെപി എം‌എൽ‌എയുടെ മകന്‍റെ അഭ്യാസ പ്രകടനം.

Also Read: COVID-19 Live Page: ലോക്ക് ഡൗണ്‍; പ്രധാനമന്ത്രിയും മുഖ്യമന്ത്രിമാരും തമ്മില്‍ നിര്‍ണായക ചര്‍ച്ച ഇന്ന്

ഗുണ്ട്‌ലുപേട്ട് ബിജെപി എം‌എൽ‌എ നിരഞ്ജൻ കുമാറിന്‍റെ മകൻ ആണ് മൈസൂർ- ഊട്ടി ദേശീയപാതയിൽ കുതിരപ്പുറത്ത് സവാരി നടത്തുന്നത്. ബിജെപി എം‌എൽ‌എയുടെ മകൻ ലോക്ക്ഡൗൺ സമയത്ത് മാസ്ക് ധരിക്കാതെ ദേശീയപാതയിൽ കുതിരപ്പുറത്ത് പോകുന്നതാണ് വീഡിയോയില്‍ കാണുന്നത്. വീഡിയോ സോഷ്യല്‍ മീഡിയയില്‍ വൈറലായതോടെ വീശദീകരണവുമായി എംഎല്‍എ രംഗത്തെത്തി.



എന്‍റെ മകന്‍ തന്നെയാണ് വീഡിയോയിൽ ഉള്ളത്. ഒരാൾക്ക് കുതിര സവാരി ചെയ്യാൻ കഴിയില്ലെന്ന് പറയുന്ന ഒരു നിയമവും കടലാസിൽ ഇല്ലെന്നായിരുന്നു എംഎല്‍എയുടെ മറുപടി. ഇന്നലെ ബാംഗ്ലൂരിലും തിങ്കളാഴ്ച്ച മൈസൂരിലുമായിരുന്നു. എന്താണ് സംഭവിച്ചതെന്ന് എനിക്കറിയില്ല, തെറ്റ് ഉണ്ടെങ്കിൽ എന്താണ് തെറ്റ്, എന്താണ് ശരി എന്ന് അവനോട് പറയും. ഞാൻ ഇപ്പോള്‍ വിഷയത്തില്‍ പ്രതികരിക്കുന്നില്ലെന്ന് കർണാടക ബിജെപി എം‌എൽ‌എ പറഞ്ഞു.

Also Read: ക്ഷണിക്കാതെ വീട്ടിൽ എത്തി ജനാലയിൽ തട്ടി വിളിച്ചു: അതിഥിയെ കണ്ട് വീട്ടമ്മ ഞെട്ടി (വീ‍ഡിയോ)

എന്നാല്‍ ദേശീയപാത അടച്ചിട്ടിരിക്കുന്ന സാഹചര്യത്തില്‍ കുതിരപ്പുറത്ത് സവാരി നടത്തിയത് തെറ്റാണോ എന്ന് പരിശോധിച്ചുകൊണ്ടിരിക്കുകയാണെന്ന് പോലീസ് പറഞ്ഞു. ഇത് സംബന്ധിച്ച് വ്യക്തത ലഭിച്ചാല്‍ നടപടി എടുക്കുമെന്നും പോലീസ് പറഞ്ഞു. ലോക്ക്ഡൗൺ മാനദണ്ഡങ്ങൾ ലംഘിച്ചതിന് ബിജെപി എം‌എൽ‌എയുടെ മകനെതിരെ നടപടിയെടുക്കണമെന്ന് സർക്കാരിനോട് പ്രതിപക്ഷ നേതാക്കള്‍ ആവശ്യപ്പെട്ടിട്ടുണ്ട്.