കലൈഞ്ജറുടെ അന്ത്യയാത്ര മറീനയിലേക്ക്; അനുഗമിച്ച് ആയിരങ്ങൾ

ചെന്നൈ: മുൻ തമിഴ്നാട് മുഖ്യമന്ത്രി കരുണാനിധിയുടെ ഭൗതികശരീരം വഹിച്ച് കൊണ്ടുള്ള വിലാപയാത്രയെ അനുഗമിച്ച് ആയിരങ്ങൾ. രാജാജി ഹാളിൽ പൊതുദർശനത്തിന് വെച്ച ശേഷമാണ് മറീന ബീച്ചിലേക്ക് വിലാപയാത്ര തുടങ്ങിയത്.

ആയിരക്കണക്കിന് ആളുകളാണ് പ്രിയ്യപ്പെട്ട കലൈഞ്ജറെ അവസാനമായി ഒരുനോക്ക് കാണാൻ ഒഴുകിയെത്തിയത്. പ്രധാനമന്ത്രി നരേന്ദ്രമോദി, കോൺഗ്രസ് അധ്യക്ഷൻ രാഹുൽ ഗാന്ധി എന്നിവരടക്കമുള്ള ദേശീയനേതാക്കൾ അന്തിമോപചാരമർപ്പിച്ചു.

പൊതുദർശനത്തിന് ഒഴുകിയെത്തിയ ജനക്കൂട്ടത്തെ നിയന്ത്രിക്കാൻ പോലീസിന് പോലുമായില്ല. ബാരിക്കേഡുകൾ പോലും മറികടന്ന് അവർ പ്രിയനേതാവിനെ ഒരു നോക്ക് കാണാൻ തിരക്ക് കൂട്ടി.

ഒടുവിൽ പോലീസിന് ചെറിയ തോതിൽ ലാത്തി വീശേണ്ടി വന്നു. തിക്കിലും തിരക്കിലും പെട്ട് രണ്ട് പേർ മരിക്കുകയും 33 പേർക്ക് പരിക്കേൽക്കുകയും ചെയ്തു. രാഷ്ട്രീയഗുരു സിഎൻ അണ്ണാദുരെയെ സംസ്കരിച്ചതിന് തൊട്ടടുത്താണ് കരുണാനിധിക്ക് അന്ത്യവിശ്രമം ഒരുക്കുന്നത്.