കേരളത്തിൽ തെരഞ്ഞെടുപ്പ് മെയ് 16 ന്; വോട്ടെണ്ണൽ 19ന്

ന്യൂഡൽഹി: കേരളമടക്കം അഞ്ച് സംസ്ഥാനങ്ങളില്‍ നിയമസഭാ തെരഞ്ഞെടുപ്പ് തീയതി പ്രഖ്യാപിച്ചു. കേരളത്തിൽ മെയ് 16ന്. ഫലപ്രഖ്യാപനം 19ന്. ഡൽഹിയിൽ ചേർന്ന യോഗത്തിന്റെ തീരുമാനങ്ങൾ മുഖ്യ തിരഞ്ഞെടുപ്പ് കമ്മീഷണര്‍ നസീം സെയ്ദി പത്രസമ്മേളനത്തില്‍ പ്രഖ്യാപിച്ചു. പെരുമാറ്റച്ചട്ടം നിലവിൽ വന്നു.

കേരളം, തമിഴ്നാട്, പശ്ചിമ ബംഗാള്‍, അസം, പുതുച്ചേരി എന്നിവിടങ്ങളിലാണ് തെരഞ്ഞെടുപ്പ് നടക്കുന്നത്. കേരളത്തില്‍ 2.56 കോടി വോട്ടര്‍മാരാണുള്ളത്. 21498 പോളിങ് സ്റ്റേഷനുകള്‍ കേരളത്തിലുണ്ടാകും. അഞ്ച് സംസ്ഥാനങ്ങളും സന്ദര്‍ശിച്ച മുഖ്യ തിരഞ്ഞെടുപ്പ് കമ്മീഷണര്‍ തിരഞ്ഞെടുപ്പ് തീയതി സംബന്ധിച്ച് രാഷ്ട്രീയ പാര്‍ട്ടികളുടെ അഭിപ്രായം തേടിയിരുന്നു. സേനാവിന്യാസത്തിന്‍റെ കാര്യത്തില്‍ കേന്ദ്ര ആഭ്യന്തര മന്ത്രാലയവുമായി പ്രാഥമിക ചര്‍ച്ചകളും പൂര്‍ത്തിയാക്കിയിട്ടുണ്ട്.

ഇത്തവണ സ്ഥാനാർത്ഥികളുടെ ചിത്രവും വോട്ടിങ് മെഷീനിൽ ഉണ്ടാവും. നോട്ടയ്ക്ക് ചിഹ്നം ഏർപ്പെടുത്തും. വോട്ടർമാരുടെ ചിത്രം പതിപ്പിച്ച സ്ലിപ്പുകൾ കമ്മീഷൻ തന്നെ വിതരണം ചെയ്യു. ഭിന്ന ശേഷിയുള്ളവർക്ക് വോട്ട് ചെ്യാൻ പ്രത്യേക സജ്ജീകരണം ഏർപ്പെടുത്തും.