വ്യാജ പാസ്പോര്‍ട്ടുമായി ഇടുക്കി സ്വദേശി ബെംഗളൂരുവില്‍ പിടിയില്‍

ബെംഗളൂരു: കുവൈറ്റില്‍ നിന്ന് വ്യാജ പാസ്പോര്‍ട്ടുമായി ഇന്ത്യയിലെത്തിയ ഇടുക്കി സ്വദേശി ബെംഗളൂരു അന്താരാഷ്ട്ര വിമാനത്താവളത്തില്‍ പിടിയില്‍ .കുവൈറ്റില്‍ ഡ്രൈവറായി ജോലി ചെയ്തിരുന്ന സണ്ണിമാത്യു (55) ആണ് പിടിയിലായത്. ഇയാളുടെ കൈവശമുളള രേഖകള്‍ പരിശോധിച്ചപ്പോഴാണ് പാസ്പോര്‍ട്ടില്‍ പതിച്ച ഫോട്ടോ ഇയാളുടെതല്ലെന്ന് തിരിച്ചറിഞ്ഞത്.

സഹപ്രവര്‍ത്തകനായ മുരളീധരന്‍ കുറവങ്ങോട് എന്നയാളുടെ പാസ്പോര്‍ട്ടുമായാണ് സണ്ണി മാത്യു ഇന്ത്യയിലേക്ക് തിരിച്ചത്. ഡ്രൈവറായി ജോലിചെയ്തിരുന്നെങ്കിലും തനിക്ക് ശമ്പളം ലഭിച്ചിരുന്നില്ലെന്നും അത് കൊണ്ട് കുവൈത്ത് വിടാന്‍ തീരുമാനിക്കുകയായിരുന്നുവെന്നും ഇയാള്‍ വെളിപ്പെടുത്തി.

2002 ലാണ് സണ്ണി മാത്യു കുവൈത്തിലെത്തുന്നത്. കഴിഞ്ഞ വര്‍ഷം നാട്ടിലെത്തിയിരുന്ന ഇയാള്‍ പിന്നീട് തിരിച്ചു പോയ ശേഷം പാസ്പോര്‍ട്ട് പുതുക്കുകയും ചെയ്തിരുന്നു.