സ്കൂളുകൾ തുറക്കാൻ സംസ്ഥാനങ്ങൾക്ക് അനുമതി
കേന്ദ്രസര്‍ക്കാരിന്‍റെ അൺലോക്ക് പ്രകീയകളുടെ ഭാഗമായി ഒക്ടോബര്‍ 15നു ശേഷം സ്കൂളുകള്‍ക്കും കോളേജുകള്‍ക്കും തുറന്നു പ്രവര്‍ത്തിക്കാൻ അനുമതിയുണ്ട്. അൺലോക്ക് അഞ്ചാം ഘട്ടത്തിന്‍റെ ഭാഗമായാണ് ഈ അനുമതി കേന്ദ്ര ആഭ്യന്തര മന്ത്രാലയം നൽകിയത്. ഇതിന് പിന്നാലെ സ്‌കൂളുകളുകളും കോളേജുകളും തുറന്ന് പ്രവർത്തിക്കുന്നതിൽ കേന്ദ്ര വിദ്യാഭ്യാസ മന്ത്രാലയം മാർഗരേഖയും പുറത്തിറക്കിയിരുന്നു. സാഹചര്യങ്ങൾ പരിഗണിച്ച് സംസ്ഥാനങ്ങൾക്ക് അന്തിമതീരുമാനം സ്വീകരിക്കാമെന്ന് വ്യക്തമാക്കിയായിരുന്നു മാർഗനിർദേശം പുറത്തിറക്കിയത്. സംസ്ഥാനങ്ങളിലെയും കേന്ദ്ര ഭരണ പ്രദേശങ്ങളും സാഹചര്യങ്ങൾ അടിസ്ഥാനമാക്കി എസ്ഒപി പുറത്തിറക്കണമെന്നും വിദ്യാഭ്യാസ മന്ത്രാലയം വ്യക്തമാക്കി.
സ്കൂൾ തുറന്നു, പിന്നാലെ കൊവിഡ് കേസുകൾ
സ്കൂളുകളുടെ പ്രവർത്തനം ആരംഭിച്ചതിനു പിന്നാലെ ഉത്തരാഖണ്ഡ്, ആന്ധ്രാപ്രദേശ് എന്നീ സംസ്ഥാനങ്ങളിൽ കൊവിഡ് കേസുകൾ റിപ്പോർട്ട് ചെയ്തിരുന്നു. കഴിഞ്ഞ തിങ്കളാഴ്ചയായിരുന്നു ഉത്തരാഖണ്ഡ് 10, 12 ക്ലാസുകൾ ആരംഭിച്ചത്. ഇന്ത്യൻ എക്സ്പ്രസിന്‍റെ റിപ്പോർട്ടുകൾ പ്രകാരം 20 സർക്കാർ സ്കൂളുകളിലായി 80 അധ്യാപകർക്ക് കൊവിഡ് സ്ഥിരീകരിച്ചിട്ടുണ്ട്. ആന്ധ്രാപ്രദേശിലും നവംബർ രണ്ടിനായിരുന്നു സ്കൂളുകളുടെ പ്രവർത്തനം ആരംഭിച്ചത്. ഇതിന് പിന്നാലെ 600 വിദ്യാർഥികൾക്കും 830 അധ്യാപകർക്കും കൊവിഡ് സ്ഥിരീകരിച്ചെന്നാണ് റിപ്പോർട്ട്. നിലവിൽ സ്കൂളുകളുടെ പ്രവർത്തനം തുടരാൻ തന്നെയാണ് സർക്കാരിന്റെ തീരുമാനം.
മഹാരാഷ്ട്രയിൽ നവംബർ 23ന് സ്കൂൾ തുറന്നേക്കും
മഹാരാഷ്ട്രയില്‍ ഒമ്പത് മുതലുള്ള ക്ലാസ്സുകള്‍ ഈ മാസം 23 മുതല്‍ ആരംഭിക്കുന്നത് പരിഗണനയിലാണ്. ഇതിനുള്ള നിര്‍ദേശം വിദ്യാഭ്യാസ വകുപ്പ് സര്‍ക്കാരിന് മുന്നില്‍ സമർപ്പിച്ചതായി സംസ്ഥാന വിദ്യാഭ്യാസ വകുപ്പ് മന്ത്രി വര്‍ഷ ഗെയ്ക്ക്‌വാദ് വ്യക്തമാക്കി. ഫെബ്രുവരി, മാര്‍ച്ച് മാസങ്ങളില്‍ നടത്തുന്ന 10,12 ക്ലാസ്സുകളിലെ പരീക്ഷകള്‍ മെയ് മാസത്തില്‍ നടത്തുന്നത് പരിഗണിക്കുന്നതായും വര്‍ഷ ഗെയ്ക്ക്‌വാദ് പറഞ്ഞു. സംസ്ഥാനത്ത് നിലവിൽ പ്രതിദിന കൊവിഡ് കേസുകൾ കുറഞ്ഞിട്ടുണ്ട്.
തീരുമാനം മാറ്റിവയ്ക്കുന്നതായി ഒഡീഷ
നേരത്തെ നവംബർ 15 മുതൽ സ്കൂളുകൾ തുറക്കുമെന്ന് പ്രഖ്യാപിച്ച ഒഡീഷ ഈ തീരുമാനം മാറ്റിയിട്ടുണ്ട്. കൊവിഡ് രണ്ടാം തരംഗത്തിനുള്ള സാധ്യതകൾ മുന്നിൽ കണ്ടാണ് തീരുമാനത്തിൽ മാറ്റം വരുത്തിയതെന്ന് വിദ്യാഭ്യാസ മന്ത്രി സമീർ രഞ്ജൻ ഡാഷ് പറഞ്ഞു. 'നവംബർ 15 ന് ശേഷം ഹയർ സെക്കൻഡറി ക്ലാസുകൾ ആരംഭിക്കാമെന്ന് പ്രത്യേക ദുരിതാശ്വാസ കമ്മീഷണർ നിർദ്ദേശിച്ചിരുന്നു. എന്നാൽ ഇപ്പോൾ, ഇത് അനിശ്ചിതകാലം വരെ നിർത്തിവച്ചിരിക്കുകയാണ്. സ്കൂളുകൾ വീണ്ടും തുറക്കുന്നത് വിദ്യാർഥികൾക്കും അധ്യാപകർക്കും ഭീഷണിയാണ്,' അദ്ദേഹം പറഞ്ഞു.
കേരളത്തിൽ ഭാഗികമായി തുറക്കുന്നത് പരിഗണനയിൽ?
കൊവിഡ് വ്യാപനം നീളുന്ന സാഹചര്യത്തിൽ സ്കൂളുകൾ ഭാഗികമായി തുറക്കുന്നതു സർക്കാരിന്റെ പരിഗണനയിലാണെന്ന് കഴിഞ്ഞദിവസം മലയാള മനോരമ റിപ്പോർട്ട് ചെയ്തിരുന്നു. നയപരമായ തീരുമാനമെടുത്താൽ ഈമാസം 15 നു ശേഷം സ്കൂളുകൾ തുറക്കാൻ തയാറാണെന്നു വിദ്യാഭ്യാസ വകുപ്പ് സർക്കാരിനെ അറിയിച്ചെന്നായിരുന്നു റിപ്പോർട്ട്. ആദ്യ ഘട്ടത്തിൽ 10 12 ക്ലാസുകളിലെ വിദ്യാര്‍ഥികളെ മാത്രം സ്കൂളിലെത്തക്കാനാണ് തയ്യാറെടുക്കുന്നതെന്നായിരുന്നു റിപ്പോർട്ട്. എന്നാൽ ഇക്കാര്യത്തിൽ സർക്കാരിന്റെ ഭാഗത്ത് നിന്ന് ഇതുവരെയും ഒരു സ്ഥിരീകരണവും ഉണ്ടായിട്ടില്ല.