കര്‍ണാടക തെരഞ്ഞെടുപ്പ്: വിവാദമായ കേരള ടൂറിസം ട്വീറ്റ് അപ്രത്യക്ഷമായി

തിരുവനന്തപുരം: ക‍ർണാടക തെരഞ്ഞെടുപ്പിനെ ട്രോളിയുളള കേരള ടൂറിസത്തിന്റെ വിവാദ ട്വീറ്റ് അപ്രത്യക്ഷമായി. വാശിയേറിയ തെരഞ്ഞെടുപ്പ് മല്‍പ്പിടിത്തത്തിനു ശേഷം ഒന്നയയാന്‍ എല്ലാ എം എല്‍ എമാരെയും ഞങ്ങള്‍ ദൈവത്തിന്റെ സ്വന്തം നാട്ടിലെ സുരക്ഷിതവും മനോഹരവുമായ റിസോര്‍ട്ടുകളിലേക്ക് ക്ഷണിക്കുന്നുവെന്നായിരുന്നു കഴിഞ്ഞ ദിവസം കേരള ടൂറിസം ട്വീറ്റ് ചെയ്തത്.

ട്വീറ്റ് വൈറലായതോടെ വിവാദമായി. പിന്നീട് ട്വീറ്റ് പിന്‍വലിച്ച് വകുപ്പ് തടിയൂരുകയായിരുന്നു. കേരള ടൂറിസത്തിന്റെ ഔദ്യോഗിക ട്വിറ്റര്‍ പേജിലാണ് കര്‍ണാടക തിരഞ്ഞെടുപ്പ് ഫലം വന്ന ചൊവ്വാഴ്ച വൈകുന്നേരം ട്വീറ്റ് പ്രത്യക്ഷപ്പെട്ടത്. ട്വീറ്റിനെ ചിലര്‍ അനുകൂലിച്ചെങ്കിലും കൂടുതല്‍ വിമര്‍ശനങ്ങളായിരുന്നുവെന്നും അതിനാല്‍ ട്വീറ്റ് ഡിലീറ്റ് ചെയ്യാന്‍ തീരുമാനിക്കുകയായിരുന്നുവെന്നും കേരള ടൂറിസം ഡയറക്ടര്‍ പി ബാലകൃഷ്ണന്‍ പറഞ്ഞു.

മണിക്കൂറുകള്‍ക്കുളളില്‍ 3000 റീ ട്വീറ്റുകളും 5000 ത്തിലധികം ലൈക്കുകളുമാണ് ട്വീറ്റിന് ലഭിച്ചത് .ഒരു പരസ്യ ഏജന്‍സിയാണ് വകുപ്പിന്റെ ട്വിറ്റര്‍ പേജ് കൈകാര്യം ചെയ്യുന്നത്. അവരാണ് ട്വീറ്റിന് പിന്നില്‍ .
Kerala Tourism,Kerala Tourism tweet viral,Kerala Tourism troll,karnataka election, Karnataka Elections 2018