കോൺഗ്രസിൻ്റെ ശബരിമല നിലപാടിനെ ന്യായീകരിച്ച് ഖുശ്ബു

ഇൻഡോര്‍: ശബരിമല യുവതീപ്രവേശനവിഷയത്തിൽ കോൺഗ്രസിനുള്ളിൽ അഭിപ്രായവ്യത്യാസമില്ലെന്ന് പാര്‍ട്ടി വക്താവും നടിയുമായ ഖുശ്ബു. കേന്ദ്രനേതൃത്വത്തിനും കേരള നേതൃത്വത്തിനും ഇക്കാര്യത്തിൽ വ്യത്യസ്ത അഭിപ്രായങ്ങളാണ് ഉള്ളതെങ്കിലും ഇക്കാര്യത്തിൽ ആശയക്കുഴപ്പമില്ലെന്ന് ഖുശ്ബു പറഞ്ഞു. മധ്യപ്രദേശിൽ തെരഞ്ഞെടുപ്പ് പരിപാടിയിൽ സംസാരിക്കുകയായിരുന്നു അവര്‍.

പ്രായഭേദമന്യേ യുവതികളെ പ്രവേശിക്കണമെന്ന കോടതിവിധി തങ്ങള്‍ക്ക് അന്തിമമാണെന്നും എന്നാൽ കേരളത്തിലെ ജനങ്ങള്‍ക്ക് ഇക്കാര്യത്തിൽ വ്യത്യസ്ത അഭിപ്രായമാണുള്ളതെന്നും ഖുശ്ബു പറഞ്ഞു. കോടതി വിലക്കിയിരിക്കുന്നത് നൂറ്റാണ്ടുകള്‍ നീണ്ടുനിന്നിരുന്ന ആചാരമാണെന്നും ഖുശ്ബു പറഞ്ഞു.

ശബരിമല വിഷയത്തിന്‍റെ മറവിൽ വര്‍ഗീയ ധ്രുവീകരണത്തിനുള്ള ശ്രമമാണ് ബിജെപി നടത്തുന്നതെന്ന് ഖുശ്ബു ആരോപിച്ചു. ദക്ഷിണേന്ത്യയിൽ ഇടം കണ്ടെത്താൻ ബിജെപി ശ്രമിക്കുകയാണ്. എന്നാൽ ബിജെപിയുടെ മുന്നിൽ ജനങ്ങള്‍ വാതിലടച്ചിരിക്കുകയാണെന്നതാണ് യാഥാര്‍ത്ഥ്യമെന്ന് അവര്‍ കൂട്ടിച്ചേര്‍ത്തു.

കോൺഗ്രസ് ലിംഗവിവേചനത്തിൽ വിശ്വസിക്കുന്നില്ല, എന്നാൽ കേരളത്തിലെ സ്ത്രീകളടക്കമുള്ളവര്‍ പിന്തുടരുന്നത് വര്‍ഷങ്ങളായി തുടര്‍ന്നു പോരുന്ന ആചാരത്തെയാണ്. ഈ വിഷയത്തിൽ പരസ്പരമുള്ള കാഴ്ചപ്പാടുകള്‍ മനസ്സിലാക്കാൻ സമയമെടുക്കുമെന്നും അവര്‍ പറഞ്ഞു.