ധാബോല്‍ക്കര്‍, ഗൗരി ലങ്കേഷ് കൊലപാതകങ്ങള്‍ തമ്മില്‍ ബന്ധമുണ്ടെന്ന് സിബിഐ

ബെംഗലൂരു: യുക്തിവാദി നരേന്ദ്ര ധബോൽക്കറിന്‍റെയും മാധ്യമ പ്രവർത്തക ഗൗരി ലങ്കേഷിന്‍റെയും കൊലപാതകങ്ങൾ തമ്മിൽ ബന്ധമുണ്ടെന്ന് സിബിഐ. ധബോൽക്കർ വധക്കേസ് പ്രതി സച്ചിൻ ആന്ദുരെയുടെ കസ്റ്റഡി നീട്ടി കിട്ടണമെന്നാവശ്യപ്പെട്ട് കോടതിയിൽ സിബിഐ സമർപ്പിച്ച അപേക്ഷയിലാണ് ഇക്കാര്യം വെളുപ്പെടുത്തിയത്.

ഗൗരി ലങ്കേഷ് വധക്കേസിലെ പ്രതികളിൽ ഒരാൾ സച്ചിന് തോക്ക് കൈമാറിയതായി സിബിഐ കോടതിയെ അറിയിച്ചു. അപേക്ഷ പരിഗണിച്ച കോടതി സച്ചിന്‍റെ കസ്റ്റഡി ഈ മാസം 30 വരെ നീട്ടി നൽകി. ധബോൽക്കർ വധക്കേസിലെ പ്രതി ശരദ് കലാസ്കറെയും കസ്റ്റഡിയിൽ വിട്ടുകിട്ടണമെന്ന് സിബിഐ കോടതിയോട് ആവശ്യപ്പെട്ടു.

പൂനൈ ആസ്ഥാനമായി പ്രവർത്തിച്ചിരുന്ന ധബോൽക്കർ 2013 ആഗസ്തിലാണ് കൊല ചെയ്യപ്പെട്ടത്. ഇക്കഴിഞ്ഞ സെപ്തംബർ ഏഴിനാണ് ഗൗരി ലങ്കേഷ് കൊല്ലപ്പെട്ടത്. കേസിൽ അറസ്റ്റിലായവർക്ക് ഹിന്ദു തീവ്രവാദ സംഘടനയായ സനാതൻ സൻസ്തയുമായി ബന്ധമുണ്ടെന്ന് അന്വേഷണത്തിൽ തെളിഞ്ഞിരുന്നു.