കുല്‍ഭൂഷണ്‍ ജാദവിനുമേല്‍ പാകിസ്താന്‍ കൂടുതല്‍ കുറ്റങ്ങള്‍ ചുമത്തി

ഇസ്‌ലാമാബാദ്: വധശിക്ഷ വിധിക്കപ്പെട്ട് പാക് ജയിലില്‍ കഴിയുന്ന കുല്‍ഭൂഷണ്‍ ജാദവിനുമേല്‍ പാകിസ്താന്‍ കൂടുതല്‍ കുറ്റങ്ങള്‍ ചുമത്തിയതായി റിപ്പോര്‍ട്ട്. ഭീകരവാദം, അട്ടിമറിപ്രവര്‍ത്തനം തുടങ്ങിയ കുറ്റങ്ങളാണ് ജാദവിനെതിരെ പാകിസ്താന്‍ കൂട്ടിച്ചേര്‍ത്തിരിക്കുന്നത്.

പാക് മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. 2016 മാര്‍ച്ചിലാണ് കുല്‍ഭൂഷണ്‍ ജാദവിനെ ചാര പ്രവൃത്തി ആരോപിച്ച് ബലൂചിസ്താന്‍ പ്രവിശ്യയില്‍ നിന്ന് പാക് സുരക്ഷാ ഉദ്യോഗസ്ഥര്‍ അറസ്റ്റ് ചെയ്തത്.

കഴിഞ്ഞ ഏപ്രിലില്‍ പാക് സൈനിക കോടതി അദ്ദേഹത്തിന് വധ ശിക്ഷ വിധിക്കുകയും ചെയ്തു. ഇന്ത്യയുടെ ഇടപെടലിനെ തുടര്‍ന്ന് ഹേഗിലെ രാജ്യാന്തര കോടതി നിലവില്‍ വധശിക്ഷ സ്റ്റേ ചെയ്തിരിക്കുകയാണ്.