കുൽഭൂഷൻ ജാദവിനെ കാണാൻ അമ്മയും ഭാര്യയും ഇന്ന് പാകിസ്ഥാനിൽ

ഇസ്ലാമാബാദ്: ചാരപ്രവൃത്തിയും ഭീകരവാദവും ആരോപിച്ച് പാകിസ്ഥാൻ വധശിക്ഷയ്ക്ക് വിധിച്ച് ജയിലില്‍ കഴിയുന്ന ഇന്ത്യന്‍ നാവികസേനാ മുന്‍ ഉദ്യോഗസ്ഥന്‍ കുല്‍ഭൂഷന്‍ ജാദവിനെ സന്ദര്‍ശിക്കുന്നതിന് അദ്ദേഹത്തിന്റെ അമ്മയും ഭാര്യയും ഇന്ന് പാകിസ്ഥാനിലെത്തും.

സന്ദർശനത്തിൻെറ ചിത്രങ്ങളും വീഡിയോയും പുറത്തു വിടും. രാവിലെ പാകിസ്ഥാനിലെത്തുന്ന ഇവര്‍ വൈകുന്നേരത്തോടെ ജാദവിനെ കണ്ട് മടങ്ങും. ഇവര്‍ക്കൊപ്പം ഔദ്യോഗിക പ്രതിനിധിയായി ഇസ്ലാമാബാദിലെ ഹൈക്കമ്മീഷന്‍ ഡെപ്യൂട്ടി കമ്മീഷണര്‍ ഉണ്ടാവും.

അമ്മയ്ക്കും ഭാര്യക്കും അദ്ദേഹത്തിനെ കാണുന്നതിനായി ഡിസംബര്‍ 20-നാണ് പാകിസ്ഥാൻ വിസ അനുവദിച്ചത്. ഇതിനൊപ്പം തന്നെ ഇസ്ലാമാബാദിലെ ഇന്ത്യന്‍ ഹൈക്കമ്മീഷന്‍ ഉദ്യോഗസ്ഥനെയും ഇവര്‍ക്കൊപ്പം ജാദവിനെ സന്ദര്‍ശിക്കാന്‍ അനുമതി നല്‍കിയിരുന്നു.

കുടുംബം പല തവണ വിസക്ക് അപേക്ഷിച്ചിരുന്നെങ്കിലും പാകിസ്ഥാൻ ഇത് നിഷേധിച്ചിരുന്നു. ചാരപ്രവര്‍ത്തി പോലുള്ള കേസിനെ തുടര്‍ന്ന് ജയിലില്‍ കഴിയുന്നവരെ സന്ദര്‍ശിക്കാന്‍ അനുവദിക്കില്ലെന്ന് കാട്ടിയാണ് വിസ നിഷേധിച്ചിരുന്നത്.