കുമാരസ്വാമി സര്‍ക്കാര്‍ ഭൂരിപക്ഷം തെളിയിച്ചു

ബെംഗലുരു: കര്‍ണാടക നിയമസഭയിൽ കോൺഗ്രസ്- ജെഡിഎസ് സഖ്യത്തിന്‍റെ എച്ച് ഡി കുമാരസ്വാമി സര്‍ക്കാര്‍ ഭൂരിപക്ഷം തെളിയിച്ചു. കുമാരസ്വാമിയുടെ വിശ്വാസപ്രമേയത്തിനു മറുപടി നല്‍കിക്കൊണ്ട് ബി എസ് യെദ്യൂരപ്പ സംസാരിച്ചതിനു ശേഷം ബിജെപി അംഗങ്ങള്‍ സഭയിൽ നിന്ന് ഇറങ്ങിപ്പോയിരുന്നു. 117 അംഗങ്ങളുടെ പിന്തുണയാണ് സ‍ര്‍ക്കാരിനുള്ളത്.

മുതിര്‍ന്ന കോൺഗ്രസ് നേതാവ് കെ ആര്‍ രമേഷ് കുമാറിനെ നിയമസഭാ സ്പീക്കറായി രാവിലെ തെര‍ഞ്ഞെടുത്തിരുന്നു. ബിജെപി സ്ഥാനാര്‍ഥി സുരേഷ് കുമാര്‍ നാമനിര്‍ദേശപത്രിക പിൻവലിച്ചതിനെത്തുടര്‍ന്ന് ഏകപക്ഷീയമായാണ് രമേഷ് കുമാര്‍ തെരഞ്ഞെടുക്കപ്പെട്ടത്.

സ്പീക്കര്‍ പദവിയുടെ മൂല്യം കാത്തുസൂക്ഷിക്കാൻ തെരഞ്ഞെടുപ്പ് ഏകപക്ഷീയമായിരിക്കണമെന്നും അതുകൊണ്ടാണ് പത്രിക പിൻവലിച്ചതെന്നും ബിഎസ് യെദ്യൂരപ്പ വിശദീകരിച്ചിരുന്നു.

വിശ്വാസപ്രമേയം അവതരിപ്പിച്ചുകൊണ്ട് സംസാരിച്ച മുഖ്യമന്ത്രി എച്ച്ഡി കുമാരസ്വാമി സംസ്ഥാനത്ത് നടപ്പാക്കാൻ ഉദ്ദേശിക്കുന്ന ക്ഷേമപദ്ധതികളെക്കുറിച്ച് സംസാരിച്ചു. ബിജെപിയുമായി സഖ്യമുണ്ടാക്കിയത് ഒരു കറുത്ത അധ്യായമായിരുന്നുവെന്നും കുമാരസ്വാമി അഭിപ്രായപ്പെട്ടു.

എന്നാൽ ഇതിനു മറുപടിപ്രസംഗം നല്‍കിയ ബിഎസ് യെദ്യൂരപ്പ കുമാരസ്വാമി വിശ്വസിക്കാൻ കൊള്ളാത്തവനെന്ന് തുറന്നടിച്ചു. കുമാരസ്വാമിയുമായി മുൻപ് സഖ്യമുണ്ടാക്കിയതിൽ ഖേദിക്കുന്നു. കാര്‍ഷികകടങ്ങള്‍ എഴുതിത്തള്ളാനുള്ള തീരുമാനം നടപ്പാക്കിയില്ലെങ്കിൽ മെയ് 28ന് കര്‍ണാടക ബന്ദ് നടത്തുമെന്നും യെദ്യൂരപ്പ മുന്നറിയിപ്പ് നൽകി.