ജുഡീഷ്യറിയെ വിമര്‍ശിച്ച് കേന്ദ്ര നിയമമന്ത്രി

ന്യൂഡൽഹി: ഭരണനിര്‍വഹണവും നയരൂപീകരണവും പാര്‍ലമെന്‍റിന്‍റെ ചുമതലയാണെന്നും അതിൽ ജുഡീഷ്യറി ഇടപെടൽ ആവശ്യമില്ലെന്നും കേന്ദ്ര നിയമമന്ത്രി രവിശങ്കര്‍ പ്രസാദ്. നിയമനിര്‍മാണം ജുഡീഷ്യറി പാര്‍ലമെന്‍റിനു വിട്ടുകൊടുക്കണമെന്നും ഭരണഘടന അനുശാസിക്കുന്ന അധികാരവിഭജനതത്വത്തെ ന്യായാധിപൻമാര്‍ മാനിക്കണമെന്നും മന്ത്രി പറഞ്ഞു.

നീതിന്യായ വ്യവസ്ഥയ്ക്ക് സ്വാതന്ത്ര്യം ഉറപ്പാക്കാൻ സര്‍ക്കാര്‍ പ്രതിജ്ഞാബദ്ധമാണ്. ഭരണനിര്‍വഹണവിഭാഗത്തിൽ തെറ്റുകള്‍ വരുമ്പോള്‍ ഇടപെടേണ്ടത് നീതിന്യായവ്യവസ്ഥയാണ്. മന്ത്രി പറഞ്ഞു.

ജുഡീഷ്യല്‍ ആക്ടിവിസത്തിനെതിരെ കേന്ദ്രസര്‍ക്കാര്‍ വിമര്‍ശമുയര്‍ത്തുന്ന സാഹചര്യത്തിലാണ് രവിശങ്കര്‍ പ്രസാദിന്റെ പ്രസ്താവനയെന്നതാണ് ശ്രദ്ധേയം. കഴിഞ്ഞദിവസം ധനമന്ത്രി അരുണ്‍ ജെയ്റ്റ്‌ലിയും ജുഡീഷ്യല്‍ ആക്ടിവിസത്തിനെതിരെ രംഗത്തെത്തിയിരുന്നു.