ലെനിൻ തീവ്രവാദിയായ വിദേശിയെന്ന് സുബ്രമണ്യൻ സ്വാമി

ന്യൂഡൽഹി: ത്രിപുരയിൽ ബിജെപി പ്രവർത്തകർ ലെനിൻ്റെ പ്രതിമ തകർത്ത സംഭവം വിവാദമാകുന്നതിനിടെ വിവാദപ്രസ്താവനയുമായി ബിജെപി നേതാവ് സുബ്രമണ്യൻ സ്വാമി. ലെനിനെ 'തീവ്രവാദിയായ വിദേശി' എന്നായിരുന്നു സുബ്രമണ്യൻ സ്വാമി വിശേഷിപ്പിച്ചത്. ലെനിൻ്റെ പ്രതിമ സ്ഥാപിക്കുന്നത് സിപിഎമ്മിൻ്റെ ആസ്ഥാനത്ത് മതിയെന്നും സുബ്രഹ്മണ്യൻ സ്വാമി പറഞ്ഞു.



സംഭവത്തിൽ ത്രിപുര ഗവർണർ തഥാഗത് റോയിയുടെ പ്രതികരണം പുറത്തുവന്നതിനു പിന്നാലെയാണ് സുബ്രഹ്മണ്യൻ സ്വാമിയുടെ പരാമർശം.


ഒരു സർക്കാർ ചെയ്ത കാര്യം മറ്റൊരു സർക്കാരിന് തിരുത്താമെന്നായിരുന്നു തഥാഗത് റോയിയുടെ ട്വീറ്റ്. മുൻപ്, ഇടതു സർക്കാർ അധികാരത്തിലിരുന്നപ്പോൾ രാജീവ് ഗാന്ധി അടക്കമുള്ളവരുടെ പ്രതിമ തകർക്കപ്പെട്ട സംഭവം ഓർമിപ്പിച്ചുകൊണ്ടായിരുന്നു തഥാഗത് റോയിയുടെ ട്വീറ്റ്. 'ജനാധിപത്യപരമായി തിരഞ്ഞെടുക്കപ്പെട്ട സർക്കാർ ഒരിക്കൽ ചെയ്ത കാര്യം ജനാധിപത്യപരമായി തിരഞ്ഞെടുക്കപ്പെട്ട മറ്റൊരു സർക്കാരിന് തിരുത്താം' അദ്ദേഹം ട്വിറ്ററിൽ കുറിച്ചു.


2008ൽ ഇടതുപക്ഷം തിരഞ്ഞെടുപ്പിൽ വിജയിച്ച് അധികാരത്തിലെത്തിയ ഉടൻ രാജീവ് ഗാന്ധിയുടെ പ്രതിമ തകർക്കപ്പെട്ടിരുന്നു.

ബിജെപി ദേശീയ ജനറൽ സെക്രട്ടറി രാം മാധവും ഇക്കാര്യത്തില് ട്വീറ്റ് ചെയ്തിരുന്നു. 'ജനങ്ങൾ ലെനിൻ പ്രതിമ തകര്ക്കുകയാണ്; റഷ്യയിലല്ല, ത്രിപുരയിൽ'- അദ്ദേഹം ട്വിറ്ററിൽ കുറിച്ചു. പിന്നീട് അദ്ദേഹം ഈ ട്വീറ്റ് ഡിലീറ്റ് ചെയ്തു.


ബിജെപിയുടെ വിജയത്തെ തുടർന്ന് ത്രിപുരയിൽ പലയിടങ്ങളിലും സിപിഎം ഓഫീസുകൾക്കും പ്രവര്ത്തകർക്കും നേരെ അക്രമം പൊട്ടിപ്പുറപ്പെട്ടിരിക്കുകയാണ്.