ബെംഗളൂരുവിൽ ഉണ്ടായത് 'സോണിക് ബൂം'; വിശദീകരണവുമായി പ്രതിരോധവകുപ്പ്

ബെംഗളൂരു: നഗരത്തിൽ ബുധനാഴ്ചയുണ്ടായ ദുരൂഹ ശബ്ദത്തിന് പിന്നിലെ കാരണം എന്താണെന്ന് വ്യക്തമാക്കി പ്രതിരോധ വകുപ്പ്. ഇന്ത്യൻ വ്യോമസേനയുടെ പോർവിമാനത്തിൻെറ പരീക്ഷണപ്പറക്കലിൻെറ ഭാഗമായുണ്ടായ സോണിക് ബൂം ആണിതെന്നാണ് പ്രതിരോധ വകുപ്പിൻെറ വിശദീകരണം. ബുധനാഴ്ച ഉച്ചയ്ക്ക് 1.45ന് ഉണ്ടായ ശബ്ദം ഭൂചലനം അല്ലെന്ന് ദുരന്തനിവാരണ വകുപ്പ് വ്യക്തമാക്കിയിരുന്നു. ശബ്ദത്തിന് പിന്നിലെ യഥാർഥ കാരണം വ്യോമസേന ഔദ്യോഗികമായി വിശദീകരിച്ചത് വൈകീട്ടാണ്.

ശബ്ദവേഗത്തിലും കൂടിയ വേഗമാണ് സൂപ്പർ സോണിക്. ശബ്ദത്തിൻെറ വേഗതയിലും കൂടിയ വേഗതയിൽ സഞ്ചരിക്കുമ്പോൾ വിമാനം തിരയിളക്കം പോലെ ശബ്ദതരംഗങ്ങൾ സൃഷ്ടിക്കും. കാതടപ്പിക്കുന്ന ശബ്ദത്തിനൊപ്പം ഭൂമികുലുക്കം ഉണ്ടാവുന്ന പോലെ തോന്നുകയും ചെയ്യും. ഇതാണ് ബുധനാഴ്ച ബെംഗളൂരുവിൽ സംഭവിച്ചത്.

Also Read: ബെംഗളൂരു നഗരത്തിൽ ഉച്ചത്തിലുള്ള ദുരൂഹമായ ശബ്ദം; ഭൂചലനമല്ലെന്ന് സ്ഥിരീകരണം

സർജാപൂർ, എച്ച്.എസ്.ആർ ലേ ഔട്ട്, വൈറ്റ് ഫീൽഡ്, എംജി റോഡ്, കല്യാൺ നഗർ, ഹെബ്ബാൾ എന്നിവിടങ്ങളിലെല്ലാം ശബ്ദം കേട്ടിരുന്നു. എച്ച്എഎൽ എയർപോർട്ടിന് പരിസരത്തുള്ള സ്ഥലങ്ങളിലാണ് പ്രധാനമായും ശബ്ദം കേട്ടത്. സോഷ്യൽ മീഡിയയിൽ നിരവധി പേർ അനുഭവം പങ്ക് വെച്ചിരുന്നു. നഗരത്തിൽ എവിടെയും നാശനഷ്ടങ്ങളൊന്നും തന്നെ ഉണ്ടായിട്ടില്ലെന്ന് ബെംഗളൂരു പൊലീസ് കമ്മീഷണർ ഭാസ്കർ റാവു അറിയിച്ചു.

Also Read: ലോകത്ത് അരക്കോടി കടന്ന് കൊവിഡ് രോഗികള്‍